ചെന്നൈ: മുസ്ലീം ലീഗിന്റെ പ്ലാറ്റിനം ജൂബിലി ആഘോഷങ്ങളുടെ ആരംഭത്തിന്റെ ഭാഗമായി ചെന്നൈയില്‍ സംഘടിപ്പിച്ച സമൂഹ വിവാഹ പരിപാടിയില്‍ 75 വിവാഹങ്ങള്‍ നടന്നു. പാര്‍ട്ടി രൂപീകൃതമായ ചെന്നൈയില്‍ കെഎംസിസി സംഘടിപ്പിച്ച പരിപാടിയില്‍ ലീഗിന്റെ നിരവധി നേതാക്കളും പ്രവര്‍ത്തകരും പങ്കെടുത്തു.
വിവിധ സംസ്ഥാനങ്ങളില്‍ നിന്നായി രണ്ടായിരത്തോളം പ്രതിനിധികള്‍ സമ്മേളനത്തില്‍ പങ്കെടുക്കും. കേരളത്തില്‍ നിന്നും 700 പ്രതിനിധികളാണ് ജൂബിലി സമ്മേളനത്തില്‍ പങ്കെടുക്കുക. ദേശീയ ഭാരവാഹികള്‍, സംസ്ഥാന പ്രവര്‍ത്തക സമിതി അംഗങ്ങള്‍ ജനപ്രതിനിധികള്‍ നിയോജകമണ്ഡലം പ്രസിഡന്റുമാര്‍ സെക്രട്ടറിമാര്‍ തുടങ്ങിയവരാണ് പങ്കെടുക്കുക.
പ്ലാറ്റിനം ജൂബിലി ആഘോഷങ്ങള്‍ ഒരു വര്‍ഷം നീളുന്നതാണ്. വെളളിയാഴ്ച നടക്കുന്ന പൊതുസമ്മേളനം തമിഴ്‌നാട് മുഖ്യമന്ത്രി എം കെ സ്റ്റാലിന്‍ ഉദ്ഘാടനം ചെയ്യും. ദേശീയ തലത്തില്‍ മതേതര ചേരിക്ക് ശക്തി പകരുന്ന ആശയങ്ങളാണ് സമ്മേളനത്തില്‍ ചര്‍ച്ചയാവുകയെന്ന് ദേശിയ ജനറല്‍ സെക്രട്ടറി പികെ.കുഞ്ഞാലികുട്ടി പറഞ്ഞു.
