പാലക്കാട്: സംസ്ഥാന സര്ക്കാരിനെതിരെ അഴിമതി ആരോപണം ഉന്നയിച്ച് കോണ്ഗ്രസ് നേതാവ് രമേശ് ചെന്നിത്തല. വഴിയോര വിശ്രമ കേന്ദ്രത്തിന്റെ പേരില് സര്ക്കാര് ഭൂമി വില്ക്കാന് ശ്രമം നടക്കുന്നുവെന്നാണ് ആരോപണം. ഇത് സംബന്ധിച്ച് ഉത്തരവ് അതീവ രഹസ്യമായി സര്ക്കാര് പുറത്തിറക്കിയെന്നും ഇതിന് പിന്നില് ദുരൂഹതയുണ്ടെന്നും ചെന്നിത്തല ആരോപിക്കുന്നു. പാലക്കാട് നടന്ന വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
‘ഒക്കില് എന്ന കമ്പനിയാണ് അഴിമതിക്കായി രൂപീകരിച്ചത്. അഴിമതിക്ക് പിന്നില് പ്രവര്ത്തിച്ചത് എം.ശിവശങ്കര് ആണ്. സ്വപ്ന സുരേഷിന് ഈ കമ്പനിയില് ജോലി നല്കാനും ശ്രമം ഉണ്ടായിരുന്നു. സര്ക്കാര് ഉടമസ്ഥതയിലെ കമ്പനിയില് എങ്ങനെ സ്വകാര്യ വ്യക്തി എം ഡിയായെന്നും ചെന്നിത്തല ചോദിച്ചു. ലാന്ഡ് അസൈമന്ഡ് ആക്റ്റ് പ്രകാരം ഭൂമി കൈമാറ്റം തെറ്റാണ് എന്ന് വ്യക്തമാക്കിയിട്ടും ശ്രമം തുടര്ന്നത് എന്തിന് ? റവന്യു വകുപ്പും, നിയമ വകുപ്പും എതിര്ത്തിട്ടും ശ്രമം തുടരുന്നതില് ദുരൂഹതയുണ്ട്. കോടികണക്കിന് രൂപയുടെ അഴിമതിക്കാണ് ശ്രമം നടക്കുന്നത്,’ ചെന്നിത്തല ആരോപിച്ചു.
‘വഴിയോര വിശ്രമ കേന്ദ്രങ്ങള് സ്ഥാപിക്കുന്നവര്ക്ക് സര്ക്കാര് ഭൂമി നല്കാമെന്നും, ആ ഭൂമി വിദേശ ബാങ്കുകള് ഉള്പ്പെടെയുളളവര്ക്ക് പണയപ്പെടുത്തി പണം വാങ്ങാമെന്നുമുളള ഉത്തരവാണ് ഇപ്പോള് പുറത്തിറങ്ങിയിരിക്കുന്നത്. ഇതിന്റെ പിന്നില് വ്യാപകമായ അഴിമതിയാണ് നടക്കുന്നത്. സ്വകാര്യ വ്യക്തികള്ക്ക് സര്ക്കാര് ഭൂമി കൊടുക്കരുതെന്ന സര്ക്കാര് നയം തന്നെ അട്ടിമറിച്ചുകൊണ്ടാണ് ഈ ഉത്തരവ് ഇറക്കിയിരിക്കുന്നത്. പ്രതിപക്ഷ നേതാവ് ആയിരുന്നപ്പോള് എതിര്ത്ത ശ്രമം ആയിരുന്നു. ഇന്നിപ്പോള് അതീവ രഹസ്യമായാണ് ഈ ഉത്തരവ് ഇറക്കിയിരിക്കുന്നത്,’രമേശ് ചെന്നിത്തല പറഞ്ഞു.