മൂവാറ്റുപുഴ: അങ്കമാലി-ശബരിമല പാത അട്ടിമറിക്കുന്നതിന് പിന്നിലുള്ള ഗൂഢാലോചന വ്യക്തമാക്കണമെന്ന് ഡീന്‍ കുര്യാക്കോസ് എംപി ആവശ്യപ്പെട്ടു. ഒരു കാരണവശാലും അങ്കമാലി – ശബരി പദ്ധതി ഉപേക്ഷിക്കരുതെന്നും അദ്ധേഹം ആവശ്യപ്പെട്ടു. അങ്കമാലി-ശബരി റയില്‍ പാത സംബന്ധിച്ച് അനിശ്ചിതാവസ്ഥയിലെന്ന കഴിഞ്ഞ ദിവസത്തെ റയില്‍ മന്ത്രിയുടെ പ്രസ്താവനയെ തുടര്‍ന്ന്, ഡല്‍ഹിയില്‍ അദ്ദേഹവുമായി നടത്തിയ കൂടികാഴ്ച്ചയില്‍ ആണ് എം.പി ഇക്കാര്യം ആവശ്യപ്പെട്ടത്.
സദ്യയ്ക്ക് വിളിച്ചതിന് ശേഷം ഭക്ഷണമില്ലെന്ന തരത്തിലാണ് കേന്ദ്ര സര്‍ക്കാര്‍ പെരുമാറുന്നത്. ഇപ്പോള്‍ തന്നെ 264 കോടി രൂപ കേന്ദ്ര സര്‍ക്കാര്‍ ഈ പദ്ധതിക്കായി വിനിയോഗിച്ചു. 100 കോടി രൂപ കഴിഞ്ഞ ബഡ്ജറ്റില്‍ അനുവദിക്കുകയും ചെയ്തു. അതിനു ശേഷം ചെങ്ങന്നൂര്‍ – പമ്പ പദ്ധതിയെ സംബന്ധിച്ച സര്‍വ്വേക്ക് തീരുമാനമെടുക്കുന്നത് ഇടുക്കി ജില്ല യുള്‍പ്പടെ, കിഴക്കന്‍ മലയോര മേഖലയോടുള്ള കടുത്ത അവഗണനയാണെന്നും എംപി പറഞ്ഞു.
വാജ്‌പേയി സര്‍ക്കാര്‍ തുടങ്ങിയ പദ്ധതി – മോദി സര്‍ക്കാര്‍ അട്ടിമറിക്കുന്നതിനു പിന്നിലുള്ള രാഷ്ട്രീയമായ ഗൂഢാലോചനയെന്തെന്ന് വ്യക്തമാക്കണം. നിലവില്‍ ചെങ്ങന്നൂര്‍ മുതല്‍ പമ്പ വരെ യുള്ള സര്‍വ്വേ പൂര്‍ത്തിയായതിനു ശേഷം സംസ്ഥാന മുഖ്യമന്ത്രിയുമായി കൂടിയാലോചിച്ച് തീരുമാനമെടുക്കാം എന്നാണ് ഒടുവില്‍ മന്ത്രി അറിയിച്ചത്. അതിന് 6 മാസമെങ്കിലും സമയം വേണമെന്നും അദ്ദേഹം പറഞ്ഞു. എന്നാല്‍ ഈ തീരുമാനം റബ്ബര്‍, ഏലം, കുരുമുളക്, കാപ്പി തുടങ്ങി കര്‍ഷക ജനതയോടുള്ള പരസ്യമായ വെല്ലുവിളിയാണെന്നും, ആയിരക്കണക്കിന് കുടുംബളാണ് കഴിഞ്ഞ 25 വര്‍ഷത്തിലധികമായി പദ്ധതി പ്രദേശത്ത് നിലയില്ലാ കയത്തിലെന്നപോലെ കഴിയുന്നതെന്നും, ബഡ്ജറ്റില്‍ വകയിരുത്തിയ തുക വിനിയോഗിച്ച് ഉടന്‍ തന്നെ പദ്ധതി പുനരാരംഭിക്കണമെന്നും ഡീന്‍ കുര്യാക്കോസ് ആവശ്യപ്പെട്ടു.
ഇത് സംബന്ധിച്ച് മുഖ്യമന്ത്രി ഉടന്‍ തന്നെ നിലപാട് വ്യക്തമാക്കണമെന്നും പദ്ധതി തുടങ്ങുന്നതിനാവശ്യമായ ചര്‍ച്ച റയില്‍വേ മന്ത്രിയുമായും , പ്രധാനമന്ത്രിയുമായും നടത്തണമെന്നും ഡീന്‍ കുര്യാക്കോസ് എംപി ആവശ്യപ്പെട്ടു.
