സോഷ്യല്‍ മീഡിയ വെബ്‌സൈറ്റായ ഫെയ്‌സ് ബുക്കിനെതിരായ ആക്ഷേപം ഡല്‍ഹി നിയമസഭ സമിതി ഇന്ന് പരിശോധിക്കും. ഫെയ്‌സ് ബുക്ക് ഇന്ത്യ പോളിസി മേധാവി അംഖിദാസിന് നിയമസഭ സമിതി ഹാജരാകാന്‍ നോട്ടീസയച്ചിട്ടുണ്ട്. ഡല്‍ഹി കലാപം ആളിക്കത്തിക്കാന്‍ ഫെയ്‌സ്ബുക്ക് ഉപയോഗിച്ച് വിദ്വേഷ പ്രചാരണം നടത്തിയ നേതാക്കളുടെ അക്കൗണ്ടുകള്‍ ഇപ്പോഴും നിലനിര്‍ത്തിയിരിക്കുന്നു, തെരഞ്ഞെടുപ്പുകളില്‍ ഫേസ്ബുക്കിന്റെ സഹായം ലഭ്യമാക്കിയിട്ടുണ്ട് എന്നിങ്ങനെയാണ് ആരോപണം.
വരുന്ന രണ്ടിന് പാര്‍ലമെന്റിലെ ഐടി സമിതിക്ക് മുന്‍പില്‍ ഹാജരാകാനും ഫെയ്‌സ്ബുക്ക് അധികൃതരോട് ആവശ്യപ്പെട്ടിട്ടുണ്ട്. അതേസമയം വിദ്വേഷ പ്രചാരണത്തിന് കൂട്ടുനിന്നിട്ടില്ലെന്നും, നിലപാട് നിഷ്പക്ഷമാണെന്നുമാണ് ഫേസ്ബുക്ക് എം.ഡി അജിത് മോഹന്‍ നേരത്തെ പ്രതികരിച്ചത്. രാജ്യത്ത് വിദ്വേഷ പ്രചാരണത്തില്‍ ഫെയ്‌സ്ബുക്ക് ബിജെപിയെ സഹായിച്ചിട്ടുണ്ടെന്നും, തെരഞ്ഞെടുപ്പുകളിലടക്കം ഫെയ്‌സ്ബുക്കിന്റെ സഹായം ലഭിച്ചിട്ടുണ്ടെന്നുമുള്ള വാള്‍സ്ട്രീറ്റ് ജേര്‍ണല്‍ റിപ്പോര്‍ട്ട് വിവാദമായിരുന്നു.
