ധീരസൈനികന് അന്ത്യാഞ്ജലി അര്പ്പിച്ച് രാജ്യം. ബ്രിഗേഡിയര് എസ്എല് ലിഡ്ഡറിന്റെ ഭൗതിക ശരീരം സംസ്കരിച്ചു. ഡല്ഹിയിലെ ബ്രാര് സ്ക്വയര് ശ്മശാനത്തിലായിരുന്നു ചടങ്ങുകള്.
പ്രതിരോധ മന്ത്രി രാജ്നാഥ് സിംഗും, മൂന്ന് സേന മേധാവികളും ചടങ്ങില് പങ്കെടുത്തു. കരസേനാ മേധാവി ജനറല് എംഎം നരവനെ, നാവിക സേനാ മേധാവി അഡ്മിറല് ആര് ഹരി കുമാര്, വ്യോമസേനാ മേധാവി ചീഫ് എയര് മാര്ഷല് വിആര് ചൗധരി എന്നിവരാണ് ബ്രിഗേഡിയര് എസ് എല് ലിഡ്ഡറിന് യാത്രാമൊഴി നല്കിയത്. എന്എസ്എ അജിത് ഡോവലും ചടങ്ങില് പങ്കെടുത്തു. ഹരിയാന മുഖ്യമന്ത്രി മനോഹര് ലാല് ഖട്ടാറും ധീരസൈനികന് അന്തിമോപചാരം അര്പ്പിച്ചു.
കൂനൂര് ഹെലികോപ്റ്റര് ധുരന്തത്തില് വീരമൃത്യു വരിച്ച ബാക്കി ഒന്പത് സൈനികരുടെ മൃതദേഹങ്ങളുടെയും ഡിഎന്എ പരിശോധന പുരോഗമിക്കുകയാണ്. അതേസമയം, ജനറല് ബിപിന് റാവത്തിന്റെ മൃതദേഹം ഡല്ഹിയിലെ വസതിയില് 11.30 മുതല് പൊതുദര്ശനം.
ഒരു മണിക്കൂര് പൊതുജനങ്ങള്ക്കും ഒരു മണിക്കൂര് സൈനികര്ക്കും അന്തിമോപചാരം അര്പ്പിക്കാം. 1.30 ന് ശേഷം ഡല്ഹി കന്റോണ്മെന്റിലെ ശ്മശാനത്തില് പൂര്ണ സൈനിക ബഹുമതികളോടെ സംസ്കാരം.
