മുല്ലപ്പെരിയാറില് മരം മുറിക്കാന് അനുമതി നല്കിയത് സര്ക്കാര് അറിവോടെയല്ലെന്ന് വനംമന്ത്രി എ കെ ശശീന്ദ്രന്. ബേബി ഡാമിലെ 15 മരങ്ങള് മുറിക്കാന് മുഖ്യമന്ത്രിയുടെ ഓഫിസ് അനുമതി നല്കിയില്ല. വിഷയത്തില് അടിയന്തര റിപ്പോര്ട്ട് ആവശ്യപ്പെട്ടെന്നും ശശീന്ദ്രന്.
ഉദ്യോഗസ്ഥ തലത്തില് മാത്രം തീരുമാനമെടുക്കേണ്ട വിഷയമല്ല ഇതെന്നും മന്ത്രി എ കെ ശശീന്ദ്രന് പറഞ്ഞു. വിഷയം മുഖ്യമന്ത്രിയുടെ ശ്രദ്ധയില്പ്പെടുത്തിയിട്ടുണ്ടെന്നും അനുമതി നല്കിയത് വീഴ്ചയെന്നും അദ്ദേഹം കൂട്ടിച്ചേര്ത്തു.
താനറിയാതെ 15 മരങ്ങള് മുറിക്കുന്നതിന് അനുമതി നല്കിയ സംഭവത്തില് പ്രിന്സിപ്പല് ചീഫ് കണ്സര്വേറ്റര് ഓഫ് ഫോറസ്റ്റ് & ചീഫ് വൈല്ഡ് ലൈഫ് വാര്ഡനോട് മന്ത്രി എ.കെ. ശശീന്ദ്രന് അടിയന്തര റിപ്പോര്ട്ട് ആവശ്യപ്പെട്ടിരിക്കുകയാണ്. തമിഴ്നാട് ജലവിഭവ വകുപ്പ് മന്ത്രി എസ് ദുരൈമുരുഗനും സംഘവും മുല്ലപ്പെരിയാര് സന്ദര്ശിച്ചിരുന്നു. ഇതിന് പിന്നാലെയാണ് മരങ്ങള് മുറിച്ച് നീക്കാനുള്ള വിവാദ അനുമതി കേരളം തമിഴ്നാടിന് നല്കുന്നത്.
മരങ്ങള് വെട്ടുന്നതോടെ തമിഴ്നാട് ബേബി ഡാം ബലപ്പെടുത്താനുള്ള പണി തുടങ്ങും. ഇതിന് ശേഷം മുല്ലപ്പെരിയാറിലെ ജലനിരപ്പ് 152 അടിയാക്കാനാണ് നീക്കം. മുല്ലപ്പെരിയാര് ജലനിരപ്പ് 152 അടിയാക്കി ഉയര്ത്തുമെന്ന് ദുരൈമുരുഗന് അറിയിച്ചിരുന്നു.