തിരുവനന്തപുരം: വര്‍ഷങ്ങള്‍ക്കുശേഷം സെക്രട്ടേറിയറ്റിലെ നോര്‍ത്ത് ഗേറ്റ് വീണ്ടും തുറക്കുന്നു. ഏപ്രില്‍ ഒന്നുമുതല്‍ സെക്രട്ടേറിയറ്റിലെ ജീവനക്കാര്‍ക്ക് ഓഫീസിന് അകത്തേക്കും പുറത്തേക്കും പോകുന്നതിന് അക്‌സസ് കണ്‍ട്രോള്‍ നിര്‍ബന്ധമാക്കും. ഇതിന്റെ ഭാ?ഗമായാണ് നോര്‍ത്ത് ഗേറ്റ് വീണ്ടും തുറക്കുന്നത്. മൂന്നു വര്‍ഷം മുന്‍പാണ് നോര്‍ത്ത് ഗേറ്റ് അടച്ചത്. സര്‍ക്കാരിനെതിരെയുള്ള പ്രതിഷേധ സമരങ്ങള്‍ നടക്കുന്നത് സെക്രട്ടേറിയറ്റിന്റെ ഈ പ്രധാന ഗേറ്റിനു മുന്നിലാണ്. നവീകരണത്തിനെന്ന പേരിലാണ് ഗേറ്റ് അടച്ചതെങ്കിലും പിന്നീട് കൊവിഡ് വ്യാപനത്തിന്റെ പശ്ചാത്തലത്തില്‍ സ്ഥിരമായി അടഞ്ഞുകിടക്കുകയായിരുന്നു. എന്നാല്‍ സര്‍ക്കാരിനെതിരായ പ്രതിപക്ഷ സമരങ്ങള്‍ തുടര്‍ച്ചയായി ഉണ്ടായതോടുകൂടി ഗേറ്റ് തുറക്കുന്നത് പിന്നെയും വൈകിപ്പിച്ചു.
മുമ്പ് ജീവനക്കാരും മന്ത്രിമാരടക്കമുള്ളവരും സെക്രട്ടേറിയേറ്റിനകത്തേക്ക് പ്രവേശിക്കാന്‍ ഉപയോഗിച്ചിരുന്നത് ഈ ഗേറ്റാണ്. നിയമസഭാ സമ്മേളനം നടക്കുമ്പോഴാണ് സമരങ്ങളുടെ എണ്ണം വര്‍ധിക്കുന്നത്. അനിശ്ചിതകാല സമരത്തിന് എത്തുന്നവര്‍ വരെ ഇവരിലുണ്ട്. ഗേറ്റ് വീണ്ടും തുറക്കുന്നതോടെ സമരങ്ങളുടെ എണ്ണത്തില്‍ വര്‍ധനവ് ഉണ്ടാവുമോ എന്നാണ് അറിയാനുള്ളത്.
