തിരുവനന്തപുരം: പുതുപ്പള്ളി ഉപതെരഞ്ഞെടുപ്പ് വിജയത്തിന് പിന്നാലെ കോണ്‍ഗ്രസില്‍ അടി മുറുകുന്നു. സംഘടനാ മികവാണ് വിജയമെന്നും വി ഡി സതീശനാണ് വിജയശില്‍പ്പിയെന്നുമുള്ള അവകാശവാദങ്ങളെയാണ് നേതാക്കളും പ്രവര്‍ത്തകരും ചോദ്യം ചെയ്യുന്നത്.
‘രമേശ് ചെന്നിത്തലയടക്കം വന്നുപോയ നേതാക്കളാണ്, സതീശനാണ് മണ്ഡലത്തില്‍ ക്യാമ്ബ് ചെയ്ത് വിജയിപ്പിച്ചത്’ — ഫലപ്രഖ്യാപനത്തെ തുടര്‍ന്നുള്ള വാര്‍ത്താ സമ്മേളനത്തില്‍ കെപിസിസി അധ്യക്ഷന്‍ കെ സുധാകരന്‍ നടത്തിയ ഈ പ്രതികരണം പാര്‍ടിക്കുള്ളില്‍ വിവാദമായി. ഇത് മുതിര്‍ന്ന നേതാക്കളിലടക്കം കടുത്ത രോഷമുണ്ടാക്കി. തൊട്ടടുത്തിരുന്ന് അത് ആസ്വദിച്ച സതീശന്‍ തിരുത്തിയില്ലെന്ന ആക്ഷേപവും നേതാക്കള്‍ പങ്കുവയ്ക്കുന്നു. വിജയിപ്പിച്ചത് ‘ടീം പുതുപ്പള്ളി’ എന്നു പറഞ്ഞ സതീശന്‍ ക്യാമ്ബ് ‘വിജയശില്‍പ്പി സതീശന്‍’ പ്രചാരണവും ശക്തമാക്കി.
വ്യക്തിയുടെതല്ല കൂട്ടായ വിജയമാണ് ഉണ്ടായതെന്ന് ഒരു മാധ്യമത്തോട് രമേശ് ചെന്നിത്തല പറഞ്ഞു. സംഘടനാപരമായ നേട്ടമല്ലെന്ന് അടിവരയിടുകയാണ് ‘യുവാക്കളെ കാണാനില്ല’ എന്ന കെ മുരളീധരന്റെ പ്രതികരണം. എന്നാല്‍, ‘ഗജവീരനാണ് മുരളി’ എന്ന് സതീശന്‍ പരിഹസിച്ച് തള്ളി.
‘ഏതു വിഷയം വന്നാലും പത്രസമ്മേളനം നടത്തി പ്രതികരിക്കുന്നവരല്ല, മരിച്ച് പണിയെടുത്ത നേതാക്കളും പ്രവര്‍ത്തകരുമാണ് വിജയത്തിനു പിന്നില്‍’– ഒരു കെപിസിസി ഭാരവാഹി . ‘പുതുപ്പള്ളിയില്‍ സംഘടനയും കമ്മിറ്റികളുമൊന്നും ഉണ്ടായിരുന്നില്ല. കുടുംബയോഗം എന്നുപറഞ്ഞാല്‍ എന്താണെന്നുവരെ ചോദിച്ചവരുണ്ട്. രാപകലില്ലാതെ പ്രവര്‍ത്തിച്ചാണ് അതൊക്കെ നടത്തിയത്. അവരില്‍ എംഎല്‍എമാരുണ്ട്, എംപിമാരുണ്ട്, മറ്റ് നേതാക്കളുണ്ട്. അവരെല്ലാമാണ് വിജയശില്‍പ്പികള്‍’– അദ്ദേഹം പറഞ്ഞു.
ജയിച്ചത് ഉമ്മന്‍ചാണ്ടിയാണെന്നും പ്രവര്‍ത്തനങ്ങള്‍ക്ക് നേതൃത്വം കൊടുത്തത് കെ സി വേണുഗോപാല്‍ ആണെന്നും ചാണ്ടി ഉമ്മന്‍ പറഞ്ഞതാണ് ശരിയെന്നാണ് നേതാക്കള്‍ ചൂണ്ടിക്കാണിക്കുന്നത്.
പുതുപ്പള്ളിയും പുനഃസംഘടനയും നേതാക്കളുടെ പരാതികളും 12ന് ചേരുന്ന കെപിസിസി യോഗത്തില്‍ ചര്‍ച്ചയാകുന്നതോടെ വിഷയം ചൂടുപിടിക്കും. വ്യക്തികേന്ദ്രീകൃതമായി കോണ്‍ഗ്രസിനെ മാറ്റുന്നതിലുള്ള രോഷം പരസ്യ ഏറ്റുമുട്ടലിലേക്ക് എത്തുമെന്നത് ഉറപ്പാണ്.
