ഇടുക്കി: കാട്ടാന വിഷയത്തില് സര്ക്കാരിന് മുന്നറിയിപ്പുമായി കര്ഷകര്. കാട്ടാനകളെ തുരത്തിയില്ലെങ്കില് ദേശീയപാത ഉപരോധിക്കുമെന്ന് കല്ലാറിലെ കര്ഷകര് മുന്നറിയിപ്പ് നല്കി. ആക്ഷന് കമ്മിറ്റി അംഗങ്ങള് പ്രശ്ന പരിഹാരത്തിനായി ജില്ലാ കളക്ടറെയും കണ്ടിരുന്നു.
കര്ഷകര് പറയുന്നത്
കാട്ടാനകളുടെ ശല്ല്യം കാരണം ലക്ഷങ്ങളുടെ നഷ്ടമാണ് കര്ഷകര്ക്ക് ഉണ്ടായിരിക്കുന്നത്. രാത്രിയാകുമ്പോഴേക്കും കാട്ടാനകള് കൂട്ടമായെത്തി കൃഷിയിടങ്ങളെല്ലാം നശിപ്പിക്കും.മുന്നാഴ്ചയ്ക്കുളളില് ഒമ്പത് ആനകളാണ് പ്രദേശത്ത് നിലയുറപ്പിച്ചിരിക്കുന്നത്. കഴിഞ്ഞ ദിവസം മാത്രം നശിപ്പിച്ചത് ഏക്കര്കണക്കിന് ഏലത്തോട്ടമാണ്. സംഭവം വനപാലകരെ അറിയിച്ചിട്ടും നടപടികള് എടുക്കുന്നില്ലെന്നാണ് നാട്ടുകാരുടെ പരാതി.
മൂന്നാറില് ഇന്ന് ഉന്നത തലയോഗം
ആനയെ തുരത്താന് ശ്രമിക്കുന്നുണ്ടെന്നാണ് വനപാലകര് പറയുന്നത്. ചിന്നക്കനാല്, ശാന്തന്പാറ പഞ്ചായത്തുകളില് ഭീതി പരത്തുന്ന അരികൊമ്പനെ പിടികൂടാനുള്ള നടപടികള് ചര്ച്ച ചെയ്യാന് മൂന്നാറില് ഇന്ന് ഉന്നത തലയോഗം ചേരും. മൂന്നാര് വനം വകുപ്പ് ഓഫീസില് മൂന്ന് മണിക്കാണ് യോഗം. ജില്ലാ കളക്ടറുടെ നേതൃത്വത്തിലാണ് യോഗം ചേരുന്നത്. 24 ന് മോക്ക് ഡ്രില് നടത്തിയ ശേഷം 25 ന് ആനയെ മയക്ക് വെടി വെയ്ക്കാനാണ് നിലവിലെ തീരുമാനം.