ഇടുക്കി: വണ്ടിപ്പെരിയാറിലെ ചുരക്കുളം എസ്റ്റേറ്റ് ലയത്തില് വച്ച് ആറ് വയസുകാരിയെ പീഡിപ്പിച്ച ശേഷം കൊന്ന് കെട്ടിത്തൂക്കിയ കേസില് ഗൂഡാലോചന നടന്നതായി ഡീന് കുര്യാക്കോസ് എംപി ആരോപിച്ചു. പ്രതി അര്ജുനെയാണ് കോടതി വെറുതേ വിട്ടത്. കട്ടപ്പന അതിവേഗ സ്പെഷല് കോടതിയുടേതാണ് ഉത്തരവ്. പ്രതിയുടെ മേല് ചുമത്തിയ കൊലപാതകവും ബലാത്സംഗവും തെളിയിക്കാന് കഴിഞ്ഞില്ലെന്നും കോടതി നിരീക്ഷിച്ചിരുന്നു.എന്നാല് , ഡിവൈഎഫ്ഐ പ്രവര്ത്തകനായ പ്രതിയെ രക്ഷിക്കുന്നതിനായി സിപിഎമ്മിന്റെ പാര്ട്ടി ഘടകങ്ങളും പോലീസും ഒത്തുകളിക്കുകയായിരുന്നുവെന്ന് ഡീന് ആരോപിച്ചത്.
സിപിഎം ഇടുക്കി ജില്ലാ നേതൃത്വത്തിന് ഇതില് പങ്കുണ്ടെന്നും ഡീന് ആരോപണം ഉന്നയിച്ചിരുന്നു. എന്നാല്,വണ്ടിപ്പെരിയാറില് ആറ് വയസുകാരിയെ പീഡിപ്പിച്ച് കൊലപ്പെടുത്തിയെന്ന കേസിലെ പ്രതിയെ വെറുതേ വിട്ട സംഭവത്തില് രാഷ്ട്രീയം കലര്ത്തരുതെന്ന് സിപിഎം ഇടുക്കി ജില്ല സെക്രട്ടറി സി.വി.വര്ഗീസ്.കുഞ്ഞിന് നീതി കിട്ടുന്നതിനായി കുടുംബത്തോടൊപ്പമാണ് പാര്ട്ടി നില്ക്കുന്നതെന്നും അദ്ദേഹം പറഞ്ഞു.
കുട്ടി കൊലപ്പെട്ട സംഭവത്തില് കുറ്റവാളിക്ക് ശിക്ഷ വാങ്ങിക്കൊടുക്കാന് സാധ്യമായ എല്ലാ കാര്യങ്ങളും സര്ക്കാര് ചെയ്തിട്ടുണ്ട്. അതിന് വേണ്ട ഇടപെടലുകളാണ് ആദ്യം മുതലേ പാര്ട്ടിയും സ്വീകരിച്ചുവരുന്നത്. ഇനിയും അത് തുടരും.ഡീന് കുര്യാക്കോസ് എംപിയുടെ ആക്ഷേപത്തിന് മറുപടി പറയാനില്ലെന്നും അദ്ദേഹം കൂട്ടിച്ചേര്ത്തു.