മൂവാറ്റുപുഴ: 12 നിർധന കുടുംബങ്ങൾക്ക് വീട് ഒരുക്കി മൂവാറ്റുപുഴ ലയൺസ് ക്ലബ്ബിൻറെ സുവർണ്ണ ജൂബിലി ആഘോഷങ്ങൾക്ക് തുടക്കo
1973 ൽ ആരംഭിച്ചു 50 വർഷങ്ങൾ പിന്നിടുന്ന മൂവാറ്റുപുഴ ലയൺസ് ക്ലബ്ബ് സുവർണ്ണ ജൂബിലി നിറവിൽ ആണ് . സുവർണ്ണ ജൂബിലി വർഷത്തിൽ 51 ജീവകാരുണ്യ പദ്ധതികൾക്കാണ് ലയൺസ് ക്ലബ്ബ് രൂപം നൽകിയിരിക്കുന്നത്.
നിർധന കുടുംബങ്ങൾക്ക് വീട് നിർമ്മിച്ച നൽകുക , ക്യാൻസർ ബാധിതരായ കുട്ടികൾക്ക് ചികിത്സാ സഹായം, സ്കൂൾ വിദ്യാർത്ഥികളിലെ നേത്രവൈകല്യങ്ങൾക്ക് പരിഹാരം കാണുക , പ്രമേഹ രോഗികൾക്കായി പരിശോധന, ഡയാലിസിസ് സഹായം, ബോധവൽക്കരണ പ്രചരണം, വിദ്യാർത്ഥികൾക്കുള്ള പഠനസഹായം, സ്കൂളുകളുടെ അടിസ്ഥാന സൗകര്യ വികസനം, വിദ്യാർത്ഥികളിൽ വായനാശീലം വളർത്തുക എന്ന ലക്ഷ്യത്തോടെ ലൈബ്രറി സജ്ജീകരണം, അനാഥാലയങ്ങൾക്കും വൃദ്ധസദനങ്ങൾക്കും സഹായം തുടങ്ങി വിവിധ പദ്ധതികൾക്കാണ് ഈ വർഷം മൂവാറ്റുപുഴ ലയൺസ് ക്ലബ്ബ് രൂപം നൽകിയിരിക്കുന്നത്
ഈ വർഷത്തെ ഏറ്റവും പ്രധാന പദ്ധതിയായ ലയൺസ് പാർപ്പിടം പദ്ധതിയിൽ ഉൾപ്പെടുത്തി നിർധനരായ 12 കുടുംബങ്ങൾക്ക് വീട് നിർമ്മിച്ചു നൽകുന്നു. മൂവാറ്റുപുഴയിലെയും പരിസര പഞ്ചായത്തുകളിലെയും രോഗബാധിതർ, , നിരാശ്രയർ, വിധവകൾ എന്നിവർക്ക് മുൻഗണന കൊടുത്താണ് വീടുകൾ നിർമ്മിച്ചു നൽകുന്നത് . രണ്ട് കുടുംബങ്ങൾക്ക് വീട് നിർമ്മിക്കുവാനുള്ള ഭൂമിയും പദ്ധതിയുടെ ഭാഗമായി ലയൺസ് ക്ലബ്ബ് നൽകും . എല്ലാ വീടുകളും 600 സ്ക്വയർ ഫീറ്റ് ഏരിയയിലാണ് നിർമ്മിക്കുന്നത്.ഒരുകോടി രൂപയോളം ആണ് വീടുകൾക്കായി ചെലവഴിക്കുന്നത്. ആറുമാസത്തിനുള്ളിൽ വീടുകൾ പൂർത്തീകരിച്ച് താക്കോൽ കൈമാറും എന്ന് മൂവാറ്റുപുഴ ലയൺസ് ക്ലബ് ഭാരവാഹികൾ വാർത്താസമ്മേളനത്തിൽ അറിയിച്ചു .
വീടുകളുടെ നിർമ്മാണ ഉദ്ഘാടനം ഒക്ടോബർ 9 താം തീയതി രാവിലെ 11:30ന് പെരിങ്ങഴയിൽ മൂവാറ്റുപുഴ എംഎൽഎ മാത്യു കുഴലനാടൻ നിർവഹിക്കും. മൂവാറ്റുപുഴ ലയൺസ് ക്ലബ് പ്രസിഡൻറ് എ ആർ ബാലചന്ദ്രൻ അധ്യക്ഷത വഹിക്കും. ഗോൾഡൻ ജൂബിലി കമ്മിറ്റി ചെയർമാൻ ഡോക്ടർ ബിനോയ് മത്തായി ലയൺസ് വൈസ് ഡിസ്ട്രിക്ട് ഗവർണർമാരായ രാജൻ എൻ നമ്പൂതിരി , ഷൈൻ കുമാർ , ലയൺസ് ഡിസ്ട്രിക്ട് നേതാക്കളായ സജി പി.റ്റി., പീറ്റർ സെബാസ്റ്റ്യൻ, ജയേഷ് വിഎസ് , സി ജി ശ്രീകുമാർ , സി ജെ ജയിംസ്, ടി.ഒ. ജോൺസൺ, സിജോ ജേക്കബ് , ജോസ് വർക്കി കാക്കനാട്ട്, പി ജി സുനിൽ കുമാർ , ജോം ജോസ് , വർഗീസ് നിരവത്ത് തുടങ്ങിയവർ പ്രസംഗിക്കും.
മൂവാറ്റുപുഴ ലയൺസ് ക്ലബ് പ്രസിഡൻറ് എ ആർ ബാലചന്ദ്രൻ ഗോൾഡൻ ജൂബിലി കമ്മിറ്റി ചെയർമാൻ ഡോക്ടർ ബിനോയി മത്തായി പ്രോജക്ട് കോഡിനേറ്റർ പി.ജി. സുനിൽകുമാർ ,പ്രോഗ്രാം കോ ഓഡിനേറ്റർ ആർ.ബിജു തുടങ്ങിയവർ വാർത്താസമ്മേളനത്തിൽ പങ്കെടുത്തു