മഹാത്മാ ഗാന്ധി സര്‍വ്വകലാശാല ഗവേഷണ വിദ്യാര്‍ത്ഥിനി നടത്തി വന്ന ഉപവാസ സമരം അവസാനിപ്പിച്ചു. വിദ്യാര്‍ത്ഥിനി ഉന്നയിച്ച ആവശ്യങ്ങള്‍ എല്ലാം സര്‍വ്വകലാശാല അംഗീകരിച്ചതിനെ തുടര്‍ന്നാണ് സമരം ഒത്തു തീര്‍പ്പായത്. യൂണിവേഴ്സിറ്റി വൈസ് ചാന്‍സലറുമായി സമരക്കാരി നടത്തിയ ചര്‍ച്ചയിലാണ് നിര്‍ണായക തീരുമാനം.
തന്റെ എല്ലാ ആവശ്യങ്ങളും സര്‍ക്കാര്‍ അംഗീകരിച്ചതായി സമരം അവസാനിപ്പിച്ച ശേഷം ഗവേഷകവിദ്യാര്‍ഥി ദീപ പി മോഹനന്‍ മാധ്യമങ്ങളോട് പറഞ്ഞു. ആരോപണ വിധേയനായ അധ്യാപകന്‍ നന്ദകുമാര്‍ കളരിക്കലിനെ നാനോ ടെക്നോളജി വിഭാഗത്തില്‍ നിന്നും മാറ്റി. 2024 വരെ ഗവേഷകയ്ക്ക് ഗവേഷണത്തിന് സമയം അനുവദിച്ചിട്ടുണ്ട്. റിസര്‍ച്ച് ഗൈഡായി ഒരാളെ കൂടി നിയോഗിക്കുകയും ചെയ്തു. ഉത്തരവിന്റെ ഡ്രാഫ്റ്റ് ലഭിച്ചതായി ഗവേഷക പറഞ്ഞു.
സമരം നൂറ് ശതമാനം വിജയമെന്നും ഗവേഷക പറഞ്ഞു. ഗവേഷണത്തിന് ആവശ്യമായ എല്ലാ മെറ്റീരിയലകളും കൃത്യസമയത്ത് നല്‍കുന്നതാണ്. ഡോ. ഇകെ രാധാകൃഷ്ണന്‍ ഗവേഷക മാര്‍ഗ ദര്‍ശിയും ഡോ. സാബു തോമസ് സഹമാര്‍ഗ ദര്‍ശിയായിരിക്കും. ഡോ. ബീനാ മാത്യുവിനെ കൂടി സഹ മാര്‍ഗദര്‍ശിയാക്കുമെന്ന് വിസി ഉറപ്പ് നല്‍കിയതായി ഗവേഷക പറഞ്ഞു.
മുടങ്ങിക്കിടന്ന ഫെലോഷിപ്പ് അനുവദിക്കും. നാല് വര്‍ഷം കൂടി ഗവേഷണ കാലയളവ് നീട്ടി നല്‍കും. സമരം സംബന്ധിച്ച് യാതൊരു പ്രതികാര നടപടിയും ഉണ്ടാകില്ല. സ്‌കൂള്‍ ഓഫ് കെമിക്കല്‍ സയന്‍സില്‍ ഇരിപ്പിടം ലഭ്യമാക്കുമെന്നും വിസി ഉറപ്പ് നല്‍കിയതായി ഗവേഷക പറഞ്ഞു.
