തിരുവനന്തപുരം: എറണാകുളം മെഡിക്കല് കോളേജില് ചികിത്സയിലുള്ള മൂന്ന് വയസുള്ള കുട്ടിയുടെ മാതാപിതാക്കള്ക്ക് കോവിഡ് 19 രോഗം സ്ഥിരീകരിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്. പത്തനംതിട്ടയില് രോഗബാധ സ്ഥിരീകരിച്ച വ്യക്തികളുമായി സമ്ബര്ക്കമുണ്ടായിരുന്ന പത്തനംതിട്ട ജില്ലയിലെ നാല് പേര്ക്കും കോട്ടയം ജില്ലയിലെ രണ്ടു പേര്ക്കും കൂടി നേരത്തെ കോവിഡ് 19 രോഗബാധ സ്ഥിരീകരിച്ചിരുന്നു. ഇതോടെ നിലവില് സംസ്ഥാനത്ത് കോവിഡ് 19 രോഗം ബാധിച്ചവരുടെ എണ്ണം 14 ആയി. കോട്ടയം മെഡിക്കല് കോളേജില് ചികിത്സയിലുള്ള 85 വയസിന് മുകളില് പ്രായമുള്ള രണ്ട് പേര് ഹൈ റിസ്കിലുള്ളവരാണ്. രണ്ടുപേരുടേയും ജീവന് രക്ഷിക്കാനുള്ള ശ്രമത്തിലാണ്. ആശുപത്രിയില് പ്രവേശിപ്പിക്കപ്പെട്ട മറ്റുള്ളവരുടെ ആരോഗ്യനിലയില് ആശങ്കയ്ക്ക് വകയില്ലെന്നും മന്ത്രി വ്യക്തമാക്കി. ആരോഗ്യ വകുപ്പിന്റെ അവലോകന യോഗത്തിന് ശേഷം സംസാരിക്കുകയായിരുന്നു മന്ത്രി.
ഇറ്റലിയില് നിന്നും വന്ന മൂന്ന് പേരുമായി സമ്ബര്ക്കത്തിലേര്പ്പെട്ട കുറേ പേരിലേക്ക് രോഗപ്പകര്ച്ച ഉണ്ടാകുമെന്നാണ് വിലയിരുത്തുന്നത്. പക്ഷെ രണ്ട് ദിവസം കൊണ്ടു തന്നെ സാധ്യമായ എല്ലാ രീതികളും ഉപയോഗിച്ച് ഇവര് സമ്ബര്ക്കത്തിലായ ബഹുഭൂരിപക്ഷം പേരേയും കണ്ടെത്തുന്നതിനും അവരെ നിരീക്ഷണത്തിലാക്കുന്നതിനും കഴിഞ്ഞു. മാപ്പിംഗ് തയാറാക്കിയാണ് ഇവര് പോയ സ്ഥലങ്ങള് കണ്ടെത്തിയത്. സാധ്യമായ എല്ലാ മാര്ഗങ്ങളും ഉപയോഗിച്ച് ബാക്കിയുള്ളവരേയും കണ്ടെത്താനായുള്ള ശ്രമത്തിലാണെന്നും മന്ത്രി അറിയിച്ചു. സംസ്ഥാനത്തെ വിവിധ ജില്ലകളിലായി 1495 പേര് നിരീക്ഷണത്തിലാണ്. ഇവരില് 1236 പേര് വീടുകളിലും 259 പേര് ആശുപത്രികളിലും നിരീക്ഷണത്തിലാണ്. സംശയാസ്പദമായവരുടെ 980 സാമ്ബിളുകള് എന്ഐവിയില് പരിശോധനയ്ക്ക് അയച്ചിട്ടുണ്ട്. ഇതില് 815 സാമ്ബിളുകളുടെ പരിശോധനാ ഫലം നെഗറ്റിവ് ആണ്. തിരുവനന്തപുരം, കോഴിക്കോട് മെഡിക്കല് കോളേജുകളില് പരിശോധനാ സംവിധാനം ഏര്പ്പെടുത്തിയിട്ടുണ്ട്. കോഴിക്കോട് മെഡിക്കല് കോളേജില് 9 പരിശോധനകള് നടത്തി. അവയെല്ലാം നെഗറ്റീവാണ്.
