ഈസ്റ്റ് മാറാടി സർക്കാർ വൊക്കേഷണൽ ഹയർ സെക്കൻ്ററി സ്കൂളിലെ നാഷണൽ സർവീസ് സ്കീം യൂണിറ്റിന് എൻ.എസ്.എസ് ദിനത്തിൽ ഇരട്ടി മധുരം , സംസ്ഥാന സർക്കാരിൻ്റെ മികച്ച എൻ.എസ്.എസ് വോളൻ്റിയർക്കുള്ള അവാർഡും, ഡോ.എ.പിജെ അബ്ദുൽ കലാം സ്റ്റഡി സെൻ്റർ മികച്ച എൻ.എസ്.എസ് യൂണിറ്റിനും പ്രോഗ്രാം ഓഫീസർക്കും നൽകുന്ന ഡോ. എ.പി.ജെ അബ്ദുൽ കലാം പുരസ്കാരവും ലഭിച്ചു. സ്കൂളിലെ വോളൻ്റിയറായിരുന്ന മീഖൾ സൂസൺ ബേബിയ്ക്കും , എൻ.എസ്.എസ് പ്രോഗ്രാം ഓഫീസർ സമീർ സിദ്ദീഖിയ്ക്കുമാണ് ഈ പുരസ്കാരങ്ങൾ ലഭിച്ചത് .
കോവിഡ് കാലത്തെ മാതൃകാ പ്രവർത്തനങ്ങൾ വിലയിരുത്തിയാണ് ഈ പുരസ്കാരം നൽകിയത്. കോവിഡ് മഹാമാരി ലോകത്തെ കീഴടക്കിയപ്പോൾ മാറാടി എന്ന ഗ്രാമത്തിലും വിദ്യാർത്ഥികളെ കൊണ്ടാകുന്നത് ചെയ്യുവാൻ കഴിഞ്ഞതിൻ്റെ സന്തോഷത്തിലാണ്. കോവിഡ് രോഗ ഭീഷണിയുടെ ആരംഭം മുതൽ വിദ്യാർത്ഥികളും അധ്യാപകരും കർമ്മനിരതരാണ്. ആയിരത്തിൽ പരം ബോട്ടിൽ ഹാൻഡ് വാഷും ക്ലീനിംഗ് ലോഷനും തയ്യാറാക്കി സൗജന്യമായി വിതരണം ചെയ്തു. ഓൺലൈനായി വിദ്യാർത്ഥികൾക്ക് തുണി മാസ്ക്ക് തയ്യാറാക്കുന്ന പരിശീലനം നൽകുകയും വിദ്യാർത്ഥികൾ വീട്ടിലിരുന്ന് കൊണ്ട് ആയിരത്തിലധികം തുണി മാസ്കുകൾ തയ്യാറാക്കി .പൊതു പരീക്ഷകൾക്ക് എത്തിയ വിദ്യാർത്ഥികൾക്കും അധ്യാപകർക്കും പരിസരത്തെ സ്കൂളുകൾക്കും സൗജന്യമായി നൽകി. മലയാളത്തിൽ പ്രസിദ്ധീകരിക്കുന്ന ലഘുലേഖകളിലെ കോവിഡ് നിർദ്ദേശങ്ങൾ അതിഥി തൊഴിലാളികൾക്ക് മനസിലാക്കാൻ കഴിയാതിരുന്ന സാഹചര്യത്തിൽ തമിഴ്, ഒഡീഷ, ബഗാളി, കന്നട, ഹിന്ദി തുടങ്ങി വിവിധ ഭാഷകളിൽ നിർദ്ദേശങ്ങളും ടോൾ ഫ്രീ നമ്പരും ഉൾപ്പെടുത്തി ലഘുലേഖകൾ തയ്യാറാക്കി മുവാറ്റുപുഴയിലും പരിസരത്തുമുള്ള അതിഥി തൊഴിലാളികൾക്ക് വിതരണം ചെയ്തു. ഈ പ്രവർത്തനത്തെ അഭിനന്ദിച്ച് കൊണ്ട് വിദ്യാഭ്യാസ വകുപ് മന്ത്രിയും, എറണാകുളം ജില്ലാ കളക്ടറും, പൊതുവിദ്യാഭ്യാസ വകുപ്പ് ഡയറക്ടറും സോഷ്യൽ മീഡിയയിൽ പോസ്റ്റ് ചെയ്തിട്ടുണ്ട്.
യാത്രക്കാരുടെയും വ്യാപാര സ്ഥാപനങ്ങളിൽ വരുന്നവരുടെയും പേര് വിവരങ്ങൾ സൂക്ഷിച്ച് വയ്ക്കുന്നതിനായി ഓട്ടോ ടാക്സി ഡ്രൈവർമാർക്കും വ്യാപാര സ്ഥാപനങ്ങളിലുമായി അഞ്ഞൂറിൽ പരം “ബ്രേക്ക് ദി ചെയിൻ’ ഡയറികൾ തയ്യാറാക്കി വിതരണം ചെയ്തു. സ്കൂൾ യൂണിറ്റ് ദത്തെടുത്ത മാറാടി ഗ്രാമപഞ്ചായത്തിലെ നാലാം വാർഡായ തൈക്കാവ് വാർഡിലെ മെമ്പർ ബാബു തട്ടാർക്കുന്നേലിൻ്റെ സഹകരണത്തോടെ ഹാൻഡ് വാഷ് കോർണർ സ്ഥാപിച്ചു, ലോക് ഡൗൺ കാലത്തെ മാനസിക സമ്മർദ്ധത്തിലായ അംഗങ്ങൾക്ക് കളി ചിരികളും വിനോദങ്ങളുമായി നിരവധി ഓൺലൈൻ മത്സരങ്ങൾ നടത്തി. വാർഡിലെ മുഴുവൻ അംഗങ്ങളെയും ഉൾപ്പെടുത്തി കൊണ്ടുള്ള വാട്സാപ്പ് ഗ്രൂപ്പ് വഴി പുഞ്ചിരി മത്സരം, സെൽഫി , കുക്കറി ഷോ, പച്ചക്കറി കൃഷി, അനുഭവം പങ്ക് വയ്ക്കൽ, ചിത്രരചന, മാസ്ക് ചലഞ്ച്, ക്ലീനിംഗ് ചലഞ്ച് തുടങ്ങി നിരവധി പരിപാടികൾ നടത്തി. സൈക്കോ സോഷ്യൽ സ്കൂൾ കൗൺസലർ ഹണി വർഗീസിൻ്റെ നേത്യത്വത്തിൽ മാനസിക പിരിമുറുക്കം കുറയ്ക്കാനായി ടെലി കൗൺസലിംഗ് സൗകര്യവും ഒരുക്കി. കോവിഡ് കാലത്ത് ദുരിതമനുഭവിക്കുന്ന കിടപ്പുരോഗികൾക്ക് സ്നേഹ സഞ്ജീവനി എന്ന പേരിൽ മരുന്നും മെഡിക്കൽ സഹായങ്ങളും എത്തിച്ചു. ആരോഗ്യ വകുപ്പുമായി സഹകരിച്ച് വിദ്യാർത്ഥികൾക്ക് കോവിഡ് പ്രതിരോധ ബോധവൽക്കരണ ക്ലാസും പരിശീലനവും നൽകി. തിരുവനന്തപുരം സ്വദേശിയായ സമീർ സിദ്ദീഖിയും ഭാര്യ തസ്നീം സമീറും മകൻ റൈഹാൻ സമീറും ഈസ്റ്റ് മാറാടിയിലാണ് കുടുംബസമേതം താമസിക്കുന്നത്.