മൂവാറ്റുപുഴ ആനിക്കാട് സെന്റ് സെബാസ്റ്റ്യന്‍സ് ഹയര്‍സെക്കന്ററി സ്‌കൂളില്‍ നടന്ന മോഷണത്തില്‍ ഹയര്‍സെക്കന്ററി ചോദ്യപേപ്പര്‍ ചോര്‍ന്നിട്ടില്ലെന്ന് ഡെപ്യൂട്ടി ഡയറക്ടര്‍ എം എസ് വിവേകാനന്ദന്‍. കഴിഞ്ഞ രാത്രിയാണ് സ്‌കൂളില്‍ മോഷണം നടന്നത്.
ചോദ്യപ്പേപ്പര്‍ സൂക്ഷിച്ചിരുന്ന റൂമിന്റെ വാതില്‍ കല്ലുകള്‍ കൊണ്ട് തകര്‍ത്താണ് മോഷ്ടാവ് അകത്ത് കയറിയത്.രാവിലെ സ്‌കൂളിലെത്തിയ ജീവനക്കാരാണ് ചോദ്യപേപ്പര്‍ സൂക്ഷിച്ചിരുന്ന റൂമിന്റെ വാതില്‍ തകര്‍ന്ന നിലയില്‍ കാണുന്നത്. ഉടന്‍ തന്നെ മൂവാറ്റുപുഴ പൊലീസില്‍ വിവരമറിയിച്ചു. മോഷണത്തിന്റെ സിസിടിവി ദൃശ്യങ്ങള്‍ പൊലീസിന് ലഭിച്ചിട്ടുണ്ട്. മുറിയിലെ മേശയില്‍ സൂക്ഷിച്ചിരുന്ന പണം നഷ്മായിട്ടുണ്ട്.
മോഷണത്തെ തുടര്‍ന്ന് ഡയറക്ടേറ്റിലെ പരീക്ഷയുടെ ചുമതലയുള്ള ഡെപ്യൂട്ടി ഡയറക്ടര്‍ സ്‌കൂളിലെത്തി പരിശോധന നടത്തി. ചോദ്യപേപ്പര്‍ സൂക്ഷിച്ചിരുന്ന അലമാര കുത്തിതുറക്കാന്‍ ശ്രമം നടന്നിട്ടില്ലെന്നാണ് പൊലീസിന്റെ പ്രാഥമിക പരിശോധനയില്‍ വ്യക്തമായത്. മോഷ്ടാവിന്റെ ലക്ഷ്യം പണം കവരുകയാണെന്ന നിഗമനത്തിലാണ് മൂവാറ്റുപുഴ പൊലീസ്.
