മുംബൈ: മഹാരാഷ്ട്രയില് കനത്ത മഴയെ തുടര്ന്നുണ്ടായ മണ്ണിടിച്ചിലില് മരിച്ചവരുടെ കുടുംബങ്ങള്ക്ക് പ്രധാനമന്ത്രി നരേന്ദ്ര മോദി ധനസഹായം പ്രഖ്യാപിച്ചു. രണ്ട് ലക്ഷം രൂപയാണ് ധനസഹായമായി പ്രധാനമന്ത്രി ദുരിതാശ്വാസ ഫണ്ടില് നിന്നും അനുവദിച്ചത്. അപകടത്തില് ഇതുവരെ 21 പേര് മരണപ്പെട്ടിട്ടുള്ളത്. ഇന്ന് പുലര്ച്ചെയാണ് ചെമ്പൂരിലെ ഭാരത് നഗറിൽ അപകടമുണ്ടായത്.
അതേസമയം, പ്രദേശത്ത് രക്ഷാപ്രവര്ത്തനം നടന്നുകൊണ്ടിരിക്കുകയാണ്. 15 പേരെ ഇവിടെ നിന്ന് രക്ഷപെടുത്തി. കനത്ത മഴയില് താഴ്ന്ന പ്രദേശങ്ങളായ ചുനഭട്ടി, സിയോണ്, ദാദര്, ഗാന്ധി മാര്ക്കറ്റ്, ചെമ്ബൂര്, കുര്ള എല്ബിഎസ് എന്നിവിടങ്ങള് പൂര്ണമായും വെള്ളത്തിനടിയിലായിരിക്കുകയാണ്. അടുത്ത അഞ്ച് ദിവസം മഹാരാഷ്ട്രയില് കനത്ത മഴയായിരിക്കുമെന്നാണ് കാലാവസ്ഥാ വകുപ്പിൻ്റെ മുന്നറിയിപ്പ്. മഴയെ തുടർന്ന് ട്രാക്കുകളില് വെള്ളം കയറിയതിനാൽ സെന്ട്രല് റെയില്വേയിലേയും വെസ്റ്റേര് റെയില്വേയിലേയും ട്രെയിന് സര്വ്വീസുകള് നിര്ത്തിവെച്ചു.