ലൈംഗികാതിക്രമ കേസില് എഴുത്തുകാരന് സിവിക് ചന്ദ്രന് മുന്കൂര് ജാമ്യം നല്കാനായി കോടതി പറഞ്ഞ കാരണം വിവാദത്തില്. പരാതിക്കാരി ലൈംഗികമായി പ്രകോപിപ്പിക്കുന്ന വസ്ത്രങ്ങള് ധരിച്ചിരുന്നു എന്ന് കോഴിക്കോട് ജില്ലാ സെഷന്സ് കോടതി ഉത്തരവില് പറയുന്നു. അതുകൊണ്ട് തന്നെ ഇന്ത്യന് ശിക്ഷാനിയമം 354എ പ്രകാരമുള്ള കുറ്റകൃത്യം പ്രഥമ ദൃഷ്ട്യാ നിലനില്ക്കില്ലെന്ന് കോടതി പറഞ്ഞു. ജാമ്യാപേക്ഷയോടൊപ്പം പരാതിക്കാരിയുടെ ചിത്രങ്ങളും സിവിക് ചന്ദ്രന് കോടതിയില് സമര്പ്പിച്ചിരുന്നു.
”ജാമ്യാപേക്ഷയോടൊപ്പം കുറ്റാരോപിതന് സമര്പ്പിച്ച ചിത്രങ്ങളില് നിന്ന് വ്യക്തമാവുന്നത് പരാതിക്കാരി ലൈംഗികമായി പ്രകോപിപ്പിക്കുന്ന വസ്ത്രങ്ങള് ധരിച്ചിരുന്നു എന്നാണ്. അതുകൊണ്ട് തന്നെ ഇന്ത്യന് ശിക്ഷാനിയമം 354എ പ്രകാരമുള്ള കുറ്റകൃത്യം പ്രഥമ ദൃഷ്ട്യാ നിലനില്ക്കില്ല.”- വിധിന്യായത്തില് കോടതി പറയുന്നു.
74കാരനായ, ശാരീരികമായി ദുര്ബലനായ പരാതിക്കാരന് പരാതിക്കാരിയെ നിര്ബന്ധപൂര്വം മടിയില് കിടത്തി ലൈംഗികാതിക്രമം നടത്തിയെന്നത് അവിശ്വസനീയമാണെന്നും കോടതി പറഞ്ഞു.
2020 ഫെബ്രുവരി എട്ടിന് നന്തി കടപ്പുറത്തെ ആളൊഴിഞ്ഞ സ്ഥലത്ത് ലൈംഗികാതിക്രമം നടത്തിയെന്ന യുവതിയുടെ പരാതിയിലാണ് സിവിക്കിനെതിരായ രണ്ടാമത്തെ കേസ്. യുവ കവയിത്രിയുടെ പരാതിയിലായിരുന്നു ആദ്യ കേസ്. 2021 ഏപ്രിലില് പുസ്തക പ്രസാധനത്തിന് കൊയിലാണ്ടിക്ക് സമീപം നന്തിയില് ഒത്തു കൂടിയപ്പോഴാണ് സംഭവമെന്നായിരുന്നു പരാതി. രണ്ടു കേസുകളും കൊയിലാണ്ടി പൊലീസ് സ്റ്റേഷനിലാണ് രജിസ്റ്റര് ചെയ്തത്. രണ്ട് കേസിലും സിവിക്കിന് മുന്കൂര് ജാമ്യം ലഭിച്ചിരുന്നു.
ആദ്യ കേസില് പ്രതിക്കെതിരെ മതിയായ തെളിവുകള് ഇല്ലെന്ന് വിലയിരുത്തിയാണ് കോടതി മുന്കൂര് ജാമ്യം അനുവദിച്ചത്. മുന്കൂര് ജാമ്യത്തിനെതിരെ അപ്പീല് നല്കാനാണ് അതിജീവിതയുടെ തീരുമാനം. രണ്ടാമത്തെ കേസില് ഉപാധികളില്ലാതെയാണ് ജാമ്യം അനുവദിച്ചത്.
ദളിതര്ക്ക് വേണ്ടി പൊതുസമൂഹത്തില് സംസാരിക്കുന്ന ആളുടെ ഉള്ളിലിരിപ്പ് മറ്റൊന്നാണെന്നും, ലൈംഗിക വൈകൃത സ്വഭാവമുള്ള സിവിക്കിന് ജാമ്യം നല്കരുതെന്നുമായിരുന്നു പ്രോസിക്യൂഷന് വാദം.