ആഡംബര കപ്പലിലെ ലഹരിപ്പാര്‍ട്ടി കേസില്‍ പിടിയിലായ മലയാളി ശ്രേയസ് നായരെ ആര്യന്‍ ഖാന്റെ ഒപ്പമിരുത്തി ചോദ്യം ചെയ്യും. ശ്രേയസ് ആര്യന്റെ സുഹൃത്താണ്. ലഹരി ഇടപാടുകള്‍ക്ക് വാട്ട്‌സ് ആപ്പ് ചാറ്റില്‍ കോഡ് ഭാഷ ഉപയോഗിച്ചു. അറസ്റ്റിലായ മലയാളി ശ്രേയസ് നായര്‍ ലഹരിക്കടത്ത് രംഗത്തെ പ്രധാനിയാണെന്നും ക്രിപ്‌റ്റോ കറന്‍സി വഴിയാണ് ഇടപാട് നടത്തിയതെന്നും എന്‍സിബി പറഞ്ഞു.
മുംബൈ കപ്പലിലെ ലഹരിപ്പാര്‍ട്ടി കേസില്‍ രണ്ടുപേര്‍ കൂടി അറസ്റ്റിലായി. ഇതോടെ കേസില്‍ അറസ്റ്റിലായവരുടെ എണ്ണം പതിനൊന്നായി. ലഹരിക്കടത്ത് കേസില്‍ പിടിയിലായവരില്‍ നിന്നും ലഭിച്ച വിവരങ്ങളുടെ അടിസ്ഥാനത്തില്‍ മുംബൈ, ഗോവ എന്നിവിടങ്ങള്‍ കേന്ദ്രീകരിച്ചാണ് നാര്‍ക്കോട്ടിക് കണ്‍ട്രോള്‍ ബ്യുറോയുടെ അന്വേഷണം. പാര്‍ട്ടി നടന്ന ആഡംബര കപ്പലിലും പരിശോധന തുടരുകയാണ്.
ആഡംബര കപ്പലിലെ 25 യാത്രക്കാര്‍ക്ക് ശ്രേയസ് നായര്‍ ലഹരി കൈമാറിയെയാണ് സൂചന. ഓണ്‍ലൈന്‍ വഴി രഹസ്യമായി ഓര്‍ഡര്‍ സ്വീകരിച്ച ശേഷം ക്രിപ്‌റ്റോ കറന്‍സി വഴിയാണ് പണം വാങ്ങിയിരുന്നതെന്ന് എന്‍സിബിക്ക് വിവരം ലഭിച്ചു. മറ്റു സംസ്ഥാനങ്ങളിലേക്കും പരിശോധന വ്യാപിപ്പിക്കാനാണ് എന്‍സിബിയുടെ തീരുമാനം.
ശനിയാഴ്ച രാത്രിയാണ് കോര്‍ഡിലിയ ക്രൂയിസില്‍ നടന്ന ലഹരിപ്പാര്‍ട്ടിയില്‍ എന്‍.സി.ബി റെയ്ഡ് നടത്തി ആര്യന്‍ ഖാനടക്കമുള്ളവരെ അറസ്റ്റ് ചെയതത്. കൊക്കൈയ്ന്‍, ഹഷീഷ്, എം.ഡി.എം.എ എന്നിവയാണ് കപ്പലിലെ റെയ്ഡില്‍ കണ്ടെത്തിയത്. സംഭവത്തില്‍ അറസ്റ്റിലായ ആര്യനടക്കമുള്ളവരെ ഒക്ടോബര്‍ ഏഴു വരെ കോടതി എന്‍.സി.ബി കസ്റ്റഡിയില്‍ വിട്ടു.
