മൂവാറ്റുപുഴ: കേരളത്തില് കോവിഡ് 19 മഹാമാരിയുടെ വ്യാപനത്തോത് വര്ദ്ധിക്കുന്ന സാഹചര്യത്തില്, ബോധവല്ക്കരണ പ്രവര്ത്തനങ്ങള് ശക്തമാക്കുക എന്ന ലക്ഷ്യത്തോടെ എറണാകുളം ജില്ലാ ഭരണകൂടത്തിന്റേയും ആരോഗ്യവകുപ്പിന്റെയും നേതൃത്വത്തിലുള്ള ക്യാമ്പയിന് തുടക്കമായി. കളക്ടറേറ്റില് വച്ച് നടന്ന ചടങ്ങില് എറണാകുളം ജില്ലാ കളക്ടര് എസ്. സുഹാസ് ലോഗോ പ്രകാശനം ചെയ്തു. ക്യാമ്പയിനിന് സ്വയം എന്നാണ് നാമകരണം ചെയ്തിരിക്കുന്നത്. അഡീഷണല് ഡി.എം.ഒ. & ജില്ലാ സര്വ്വൈലന്സ് ഓഫീസര്, ഡോ എസ്.ശ്രീദേവി, ജില്ലാ എഡുക്കേഷന് മീഡിയ ഓഫീസര് സി.എം ശ്രീജ, തര്ബിയത്ത് സ്കൂള് മാനേജര് ടി.എസ്. അമീര്, നാസിം പി.എ, രഞ്ജിത്ത് കരുണാകരന് തുടങ്ങിയവര് ചടങ്ങില് പങ്കെടുത്തു.
അച്ചടി ദൃശ്യ ശ്രാവ്യ മാധ്യമങ്ങളിലൂടെയും സോഷ്യല് മീഡിയയിലൂടെയും ബോധവല്ക്കരണ സന്ദേശങ്ങള് പ്രചരിപ്പിക്കുവാനാണ് ലക്ഷ്യം വയ്ക്കുന്നത്. കൂടാതെ തര്ബിയത്ത് വൊക്കേഷണല് ഹയര് സെക്കന്ററി സ്കൂള് നാഷണല് സര്വീസ് സ്കീമിലെ വോളണ്ടിയര്മാര് പ്രചരണത്തിന്റെ ഭാഗമാകും. എറണാകുളം ജില്ലയിലെ റെസിഡന്റ്സ് അസോസിയേഷനുകള്, സാംസ്കാരിക സംഘടനകള്, വിവിധ ക്ലബ്ബുകള്, തൊഴിലാളി സംഘടനകള്, തുടങ്ങിയവ മുഖാന്തിരം ക്യാമ്പയിന് കൂടുതല് പൊതുജനങ്ങളിലേയ്ക്കെത്തിയ്ക്കുവാനാണ് പദ്ധതി.
സിനിമ, രാഷ്ട്രീയ, സാമൂഹിക, രംഗങ്ങളില് പ്രശസ്തരായ വ്യക്തികളെ ഉള്പ്പെടുത്തി, ആരോഗ്യ വിഷയങ്ങളില് (കോവിഡ് 19) ജാഗ്രത പുലര്ത്തേണ്ടതിന്റെ ആവശ്യകത മുന്നിര്ത്തി, രണ്ടു മിനിറ്റില് കവിയാതെയുള്ള ഇന്ഫര്മേറ്റീവ് വീഡിയോ സന്ദേശം നിര്മ്മിച്ചുകൊണ്ടുള്ള പ്രചരണവും സ്വയത്തിന്റെ ഭാഗമാണ്.
മൂവാറ്റുപുഴ തര്ബിയത്ത് ട്രസ്റ്റ് വൊക്കേഷണല് ആന്റ് ഹയര് സെക്കന്ററി സ്കൂള് നാഷണല് സര്വ്വീസ് സ്കീം, ടി കോഫി, ഫിലിംയാന് മുംബൈ, പാഷന് ഫ്രൂട്ട് പ്രൊഡക്ഷന് കമ്പനി തുടങ്ങിയ പ്രസ്ഥാനങ്ങള്ക്കൊപ്പം ടീം സമോവറും (സമോവര് ചായപ്പീടിക, പള്ളുരുത്തി), ഒറ്റയ്ക്കല്ല ഒരുമിച്ച് വാട്ട്സാപ്പ് കൂട്ടായ്മയും ഈ പരിപാടിയുമായി സഹകരിക്കുന്നു.