നടിയെ ആക്രമിച്ച കേസിലെ മാപ്പുസാക്ഷിയെ ഭീഷണിപ്പെടുത്തിയ സംഭവത്തില് കെ. ബി ഗണേഷ് കുമാര് എം.എല്.എയുടെ പിഎ പ്രദീപ് കുമാര് അന്വേഷണ ഉദ്യോഗസ്ഥന് മുന്പില് ഹാജരായി. കാസര്ഗോഡ് ജില്ലാ സെഷന്സ് കോടതി നിര്ദേശ പ്രകാരമാണ് പ്രദീപ് കുമാര് കാഞ്ഞങ്ങാട് ഡി.വൈ.എസ്.പിക്ക് മുന്പില് ഹാജരായത്.
നടിയെ ആക്രമിച്ച കേസിലെ പ്രോസിക്യൂഷന് സാക്ഷിയായ തൃക്കണ്ണാട് സ്വദേശി വിപിന് ലാലിനെ ഭീഷണിപ്പെടുത്തിയെന്ന പരാതിയിലാണ് പ്രദീപ് കുമാര് അന്വേഷണ ഉദ്യോഗസ്ഥന് മുന്പില് ഹാജരായത്. കാഞ്ഞങ്ങാട് ഡിവൈഎസ്പിയുടെ നേതൃത്വത്തില് പ്രദീപിന്റെ ചോദ്യം ചെയ്യല് തുടരുകയാണ്. നവംബര് 19 വരെ അറസ്റ്റ് ചെയ്യരുതെന്ന കോടതി നിര്ദേശമുള്ളതിനാല് കോടതി അനുവാദത്തോടെ മാത്രമേ പ്രദീപിനെ അറസ്റ്റ് ചെയ്യാന് സാധിക്കൂ.
പ്രദീപ് കുമാര് വിപിന് ലാലിന്റെ വീട്ടിലും അമ്മാവന് ജോലി ചെയ്യുന്ന ജ്വല്ലറിയിലുമെത്തിയിരുന്നു. ദിലീപിന്റെ വക്കീല് ഗുമസ്തനെന്ന് പരിചയപ്പെടുത്തിയ ശേഷം കേസില് ദിലീപിന് അനുകൂലമായി മൊഴി നല്കാനും ആവശ്യപ്പെട്ടു. തുടര്ന്ന് ഭീഷണി കത്തുകളും വന്നതോടെയാണ് കഴിഞ്ഞ സെപ്റ്റംബര് 26 ന് വിപിന് ലാല് ബേക്കല് പൊലീസില് പരാതി നല്കിയത്. കേസില് ജ്വല്ലറിയിലെ സിസിടിവി ദൃശ്യങ്ങളും ഹോട്ടലില് നല്കിയ തിരിച്ചറിയല് രേഖകളും പരിശോധിച്ച ശേഷമാണ് പ്രദീപിന്റെ സാന്നിധ്യം പൊലീസ് കണ്ടെത്തിയത്. ഭീഷണി കത്തുകള് അയച്ചതിലും ഫോണ് കോണുകളെ സംബന്ധിച്ചും പ്രദീപിനുള്ള പങ്ക് വിശദമായി അന്വേഷിക്കുകയാണ്.
