തിരുവനന്തപുരം: ഓട്ടോറിക്ഷ ഡ്രൈവറായ വയോധികനെ ആക്രമിച്ച് പണം കവര്ന്ന സംഭവത്തില് യുവാവ് അറസ്റ്റില്. പൊലീസിന്റെ കരുതല് തടങ്കലില് നിന്ന് പുറത്തിറങ്ങിയ റെമോ എന്ന അരുണ് (24) ആണ് പാലോട് പൊലീസിന്റെ പിടിയിലായത്. പാലോട് ഓട്ടോറിക്ഷാ ഡ്രൈവറായ ഊളന്കുന്ന് ആലംപ്പാറ കോനത്ത് വീട്ടില് സുരേന്ദ്രനെ (73) ആക്രമിച്ച് പണം തട്ടിയ കേസിലാണ് അരുണ് അറസ്റ്റിലായത്.
തിങ്കളാഴ്ച രാത്രി ഒമ്പത് മണിയോടെയായിരുന്നു സംഭവം നടന്നത്. വീട്ടിലേക്ക് മടങ്ങുകയായിരുന്ന സുരേന്ദ്രനെ പിന്തുടര്ന്ന് വന്ന അരുണ് കത്തി കാട്ടി ഭീഷണിപ്പെടുത്തുകയായിരുന്നു. സുരേന്ദ്രന്റെ പോക്കറ്റ് വലിച്ച് കീറി അതില് ഉണ്ടായിരുന്ന രണ്ടായിരം രൂപ പിടിച്ച് പറിക്കുകയായിരുന്നുവെന്ന് പൊലീസ് പറഞ്ഞു. സുരേന്ദ്രന് നല്കിയ പരാതിയുടെ അടിസ്ഥാനത്തില് കേസെടുത്തു. തുടര്ന്ന് നടത്തിയ അന്വേഷണത്തിലാണ് പ്രതിയെ പിടികൂടുന്നത്.
ഉള്വനത്തില് ഏറുമാടം കെട്ടി ഒളിവില് താമസിക്കുകയായിരുന്നു അരുണ്. ഇയാള് നിരവധി ക്രിമിനല് കേസുകളിലെ പ്രതിയാണെന്ന് പൊലീസ് പറഞ്ഞു. നെടുമങ്ങാട് കോടതിയില് ഹാജരാക്കിയ പ്രതിയെ റിമാന്ഡ് ചെയ്യുകയും ചെയ്തു.
