തിരുവല്ല മല്ലപ്പള്ളി യുഡിഎഫ് സ്ഥാനാര്ത്ഥിയായിരുന്ന വിബിത ബാബുവിനെതിരെ സാമ്പത്തിക തട്ടിപ്പിന് പരാതി. പാലാ സ്വദേശിയായ പ്രവാസിയാണ് പരാതി നല്കിയത്. ഇയാളെ കബളിപ്പിച്ച് 14 ലക്ഷം രൂപ തട്ടിയെടുത്തെന്നാണ് പരാതി.
പാലാ സ്വദേശിയായ പ്രവാസിക്കെതിരെ വിബിത ബാബുവും പരാതി നല്കിയിട്ടുണ്ട്. വക്കീല് ഓഫീസില് കയറി തന്നെ ആക്രമിച്ചെന്നാണ് വിബിത ബാബുവിന്റെ പരാതി. അമേരിക്കയില് ജോലി ചെയ്യുന്ന മലയാളിയെ കബളിപ്പിച്ചെന്നും പലതവണയായി 14 ലക്ഷം രൂപ വിബിതയ്ക്ക് അയച്ചുകൊടുത്തെന്നുമാണ് പരാതിയില് പറയുന്നത്. പണം അയച്ചു നല്കിയതിന്റെ തെളിവുകളും പരാതിക്കാരന് സമര്പ്പിച്ചിട്ടുണ്ട്.
വിബിത ബാബുവിനെയും പിതാവിനെയും ഒന്നും രണ്ടും പ്രതികളായിട്ടാണ് തിരുവല്ല പൊലീസ് കേസെടുത്തിരിക്കുന്നത്. ഈ പരാതിക്ക് പിന്നാലെയാണ് വിബിത ബാബു പരാതിക്കാരനെതിരെ മറ്റൊരു പരാതി നല്കിയത്. തന്റെ ഓഫീസില് കയറി ദുരുദ്ദേശത്തോടെ പെരുമാറിയെന്നാണ് പ്രവാസിക്കെതിരായ പരാതി. ഇതിന്റെ അടിസ്ഥാനത്തില് ഇയാള്ക്കെതിരെയും പൊലീസ് കേസ് രജിസ്റ്റര് ചെയ്തു.
ജില്ല പഞ്ചായത്ത് തെരഞ്ഞെടുപ്പില് മല്ലപ്പള്ളി ഡിവിഷനിലെ സ്ഥാനാര്ഥിയായിരുന്നു വിബിത ബാബു. വിബിതയ്ക്ക് പുറമെ, അച്ഛന് ബാബു തോമസിനെയും പ്രതി ചേര്ത്താണ് എഫ്ഐആര്. ഇവരുടെയും അക്കൗണ്ടുകളിലേക്കാണ് മാത്യു സെബാസ്റ്റ്യന് പണം അയച്ചു നല്കിയത്. അമേരിക്കയില് താമസമാക്കിയ വ്യക്തിയാണ് പരാതിക്കാരന്.
വിബിത സുഹൃത്ത് വഴിയാണ് മാത്യു സെബാസ്റ്റ്യന് പരിചയപ്പെട്ടതെന്നാണ് എഫ്ഐആറില് പറയുന്നത്. വസ്തു സംബന്ധമായ കേസുമായി ബന്ധപ്പെട്ട് 2020 ജൂലൈ 19നും 2021 ജനുവരി ഏഴിനുമിടയില് മണി ട്രാന്സ്ഫര് വഴി 8,78,117 രൂപയും 2021 മാര്ച്ച് 13 മുതല് ഏപ്രില് 15വരെ 1,41,985 രൂപയും വാങ്ങി. തെരഞ്ഞെടുപ്പില് മത്സരിക്കാനെന്ന പേരില് വിബിതയുടെ അച്ഛന് ബാബുവിന്റെ അക്കൗണ്ടിലേക്ക് 2,91,984 രൂപയും വിബിതയുടെ നിര്ദേശാനുസരണം സുഹൃത്തിന്റെ അക്കൗണ്ടിലേക്ക് 1,04,208 രൂപയും ഉള്പ്പെടെ 14,16,294 രൂപയും വാങ്ങിയെന്നാണ് എഫ്ഐആര്.
കൊവിഡ് കാലം കഴിഞ്ഞശേഷം പണം തിരികെ നല്കാമെന്നായിരുന്നു വാഗ്ദാനം. പണം കിട്ടില്ലെന്ന് മനസിലായപ്പോള് ജൂണ് 17ന് വിബിതയ്ക്ക് വക്കീല് നോട്ടീസ് അയച്ചു. എന്നിട്ടും പണം ലഭിക്കാതെ വന്നതോടെയാണ് തിരുവല്ല പോലീസില് കേസ് കൊടുത്തതെന്നാണ് റിപ്പോര്ട്ട്.
മഹിളാ കോണ്ഗ്രസ് നേതാവായ വിബിത ജില്ലാ പഞ്ചായത്ത് തെരഞ്ഞെടുപ്പില് മല്ലപ്പള്ളി ഡിവിഷനില് കോണ്ഗ്രസ് സ്ഥാനാര്ഥിയായി ജനവിധി തേടിയിരുന്നു. തെരഞ്ഞെടുപ്പ് കാലത്ത് ഇവര് സോഷ്യല് മീഡിയയില് ശ്രദ്ധിക്കപ്പെടുകയും ചെയ്തു. എന്നാല് വാര്ഡില് വിജയിക്കാന് ബബിതയ്ക്ക് കഴിഞ്ഞില്ല. എല്ഡിഎഫിനായിരുന്നു ഇവിടെ ജയം. 10469 വോട്ടുകള്ക്കാണ് എല്ഡിഎഫിന്റെ സി കെ ലതാകുമാരി വിജയിച്ചത്. യുഡിഎഫ് സ്ഥാനാര്ഥി അഡ്വ. വിബിത ബാബുവിന് ലഭിച്ച 9178 വോട്ട്.
