ബിഹാറിലെ നവാഡയില്‍ അഞ്ച് ജൂനിയര്‍ ഉദ്യോഗസ്ഥരെ പൊലീസ് ഓഫീസര്‍ ലോക്കപ്പിലിട്ടെന്ന് പരാതി. എസ്.പി ഗൗരവ് മംഗലക്കെതിരെയാണ് ആരോപണം ഉയര്‍ന്നത്. സംഭവത്തിന്റെ സി.സി.ടി.വി ദൃശ്യങ്ങള്‍ പുറത്തു വന്നു. സെപ്തംബര്‍ എട്ടിനാണ് സംഭവം നടന്നത്.
സെപ്തംബര്‍ 8ന് രാത്രി 9 മണിയോടെ സ്റ്റേഷനിലെത്തിയ എസ്.പി ചില കേസുകളുടെ അന്വേഷണ പുരോഗതി പരിശോധിക്കുകയായിരുന്നു. ചില പൊലീസുകാര്‍ കൃത്യനിര്‍വഹണത്തില്‍ വീഴ്ച വരുത്തിയെന്ന് ആരോപിച്ച് എസ്.പി ലോക്കപ്പില്‍ കയറ്റിയെന്നാണ് ആരോപണം. എന്നാല്‍ പൊലീസുകാരുടെ ഭാഗത്ത് എന്തുവീഴ്ചയാണുണ്ടായതെന്ന് വ്യക്തമല്ല.
എസ്.ഐമാരായ ശത്രുഘ്‌നന്‍ പാസ്വാന്‍, രാംരേഖ സിങ്, എ.എസ്.ഐമാരായ സന്തോഷ് പാസ്വാന്‍, സഞ്ജയ് സിങ്, രാമേശ്വര്‍ ഉറോണ്‍ എന്നിവരെയാണ് നാഗര്‍ പൊലീസ് സ്റ്റേഷനില്‍ ലോക്കപ്പിലാക്കിയത്. രണ്ട് മണിക്കൂര്‍ കഴിഞ്ഞ് അര്‍ധരാത്രിയോടെ എല്ലാവരെയും തുറന്നു വിട്ടു.
അന്വേഷണം വേണമെന്ന് ബിഹാര്‍ പൊലീസ് അസോസിയേഷന്‍ ആവശ്യപ്പെട്ടു. എന്നാല്‍ ഇത്തരത്തിലൊരു സംഭവമുണ്ടായിട്ടില്ലെന്ന് എസ്.പി പ്രതികരിച്ചു.
വ്യാജവാര്‍ത്തയാണെന്ന് എസ്.പി പറഞ്ഞതിനു പിന്നാലെ ദൃശ്യങ്ങള്‍ പുറത്തു വന്നു. എസ്.പിയുമായി ബന്ധപ്പെടാന്‍ ശ്രമിച്ചെങ്കിലും സാധിച്ചില്ലെന്ന് ബിഹാര്‍ പൊലീസ് അസോസിയേഷന്‍ പ്രസിഡന്റ് മൃത്യുഞജയ് കുമാര്‍ സിങ് പറഞ്ഞു. എസ്.പി സി.സി.ടി.വി ദൃശ്യങ്ങളില്‍ കൃത്രിമം നടത്താന്‍ സാധ്യതയുണ്ടെന്നും അദ്ദേഹം ആരോപിച്ചു.
ജൂനിയര്‍ ഓഫീസര്‍മാരുടെ മനോവീര്യം കെടുത്തുന്നതിനെതിരെ നടപടിയെടുക്കണമെന്ന് പൊലീസ് അസോസിയേഷന്‍ ആവശ്യപ്പെട്ടു. കീഴുദ്യോഗസ്ഥരോടുള്ള ഇടപെടലില്‍ ശ്രദ്ധിക്കണമെന്ന് എല്ലാ മുതിര്‍ന്ന ഉദ്യോഗസ്ഥര്‍ക്കും ബിഹാര്‍ ചീഫ് സെക്രട്ടറി നിര്‍ദേശം നല്‍കി.
