സംസ്ഥാനത്ത് ഒമിക്രോണ് ജാഗ്രതയില് ആള്ക്കൂട്ട നിയന്ത്രണം കര്ശനമായി നിലനില്ക്കെ അഞ്ഞൂറിലേറെ പേരെ പങ്കെടുപ്പിച്ച് സിപിഎമ്മിന്റെ സമൂഹ തിരുവാതിര. സിപിഎം തിരുവനന്തപുരം ജില്ലാ സമ്മേളനത്തിന് മുന്നോടിയായി പാറശാലയിലാണ് മെഗാ തിരുവാതിര പാര്ട്ടി സംഘടിപ്പിച്ചത്. എംഎ ബേബി, ജില്ലാ സെക്രട്ടറി ആനാവൂര് നാഗപ്പന് എന്നിവരുടെ സാന്നിദ്ധ്യത്തിലായിരുന്നു തിരുവാതിര.
പാര്ട്ടി പാറശാല ഏരിയ കമ്മിറ്റിയിലെ വനിതകളാണ് തിരുവാതിരയില് പങ്കെടുത്തിരുന്നത്. ഇവരെക്കൂടാതെ, തിരുവാതിര കളി കാണാനായും നിരവധി പേര് എത്തിയിരുന്നു. നിയന്ത്രണങ്ങള് പാര്ട്ടി സമ്മേളനങ്ങള്ക്കും ബാധകമാണെന്ന് ആരോഗ്യമന്ത്രി വ്യക്തമാക്കിയിരുന്നു. ഈ വേളയിലാണ് ഭരണ പാര്ട്ടി തന്നെ നിയമ ലംഘകരായി മാറിയിരിക്കുന്നത്.
മുഖ്യമന്ത്രിയുടെ അധ്യക്ഷതയില് ചേര്ന്ന കോവിഡ് അവലോകന യോഗത്തില്, വിവാഹ – മരണ ചടങ്ങുകളില് പങ്കെടുക്കാവുന്നവരുടെ എണ്ണം 50 ആക്കി നിജപ്പെടുത്തിയിരുന്നു. സ്കൂളുകള് ഉടന് അടയ്ക്കില്ലെന്നും സര്ക്കാര് വ്യക്തമാക്കിയിരുന്നു. പൊതു- സ്വകാര്യ പരിപാടികളില് ആള്ക്കൂട്ട നിയന്ത്രണം കര്ശനമാക്കാനും തീരുമാനിച്ചിരുന്നതാണ്. ഓഫീസ് പ്രവര്ത്തനങ്ങള് പരമാവധി ഓണ്ലൈനാക്കണം എന്ന നിര്ദേശം നല്കുമെന്നും അറിയിച്ചിരുന്നതാണ്.
