ഡി.സി.സി.കള്‍ പുനസംഘടിപ്പിക്കുമ്പോള്‍ അഞ്ചുവര്‍ഷം ഭാരവാഹികളായിരുന്നവരെ പരിഗണിക്കില്ല. 10 വര്‍ഷം പൂര്‍ത്തിയാക്കിയവരെ ഡി.സി.സി. ഭാരവാഹികളാക്കേണ്ടതില്ലെന്നായിരുന്നു ആദ്യം ആലോചിച്ച മാനദണ്ഡം. ഭാരവാഹികളുടെ എണ്ണം നാലിലൊന്നായി കുറയ്‌ക്കേണ്ടതിനാലാണ് അഞ്ചു വര്‍ഷമെന്ന പുതിയ വ്യവസ്ഥ കൊണ്ടു വന്നത്.
തദ്ദേശസ്ഥാപന അദ്ധ്യക്ഷന്മാര്‍, ഉപാദ്ധ്യക്ഷന്മാര്‍, സ്റ്റാന്‍ഡിംഗ് കമ്മിറ്റി ചെയര്‍മാന്‍മാര്‍, ജില്ലാ പഞ്ചായത്തംഗങ്ങള്‍ എന്നിവരെയും ഭാരവാഹികളാക്കില്ല. കരട് മാനദണ്ഡങ്ങള്‍ ഡി.സി.സി ഭാരവാഹികളുടെയും ബ്ലോക്ക് പ്രസിഡന്റുമാരുടെയും നിയമനത്തിനായി കെ.പി.സി.സി മുന്നോട്ടുവച്ചു.
മുന്‍നിര നേതാക്കളുടെ അഭിപ്രായം അറിഞ്ഞ ശേഷം ആവശ്യമെങ്കില്‍ ഭേദഗതി വരുത്തും. തുടര്‍ന്ന് രണ്ട് ദിവസത്തിനകം മാനദണ്ഡം അന്തിമമാക്കും. അതിനുശേഷം ഡി.സി.സികളുടെ ചുമതലയുള്ള കെ.പി.സി.സി ജനറല്‍ സെക്രട്ടറിമാര്‍ അതത് ജില്ലകളിലെത്തി ഡി.സി.സി അദ്ധ്യക്ഷന്മാര്‍ക്കൊപ്പം മുതിര്‍ന്ന നേതാക്കളുമായി ചര്‍ച്ച ചെയ്ത് ഒരാഴ്ചയ്ക്കകം ഭാരവാഹിപ്പട്ടിക അന്തിമമാക്കും. അതിന് ശേഷം ഔദ്യോഗികമായി ഭാരവാഹികളെ കെ.പി.സി.സി പ്രഖ്യാപിക്കും.
പുതിയ ഭാരവാഹികളില്‍ പകുതിപ്പേരെങ്കിലും പുതുമുഖങ്ങളായിരിക്കണമെന്നാണ് നിര്‍ദേശം. കെ.പി.സി.സി. നിശ്ചയിച്ച ഉപസമിതിയാണ് പുതിയ മാനദണ്ഡങ്ങള്‍ നിശ്ചയിച്ചത്. ഇത് അടുത്ത ദിവസം തന്നെ കെ.പി.സി.സി. പ്രസിഡന്റ് കെ. സുധാകരന് കൈമാറും. ഒരാള്‍ക്ക് ഒരുപദവി എന്ന തത്ത്വം പാലിക്കും വിധമാകും പുനഃസംഘടന.
ബ്ലോക്ക് പ്രസിഡന്റ് സ്ഥാനത്തേക്ക് മുഴുവന്‍ സമയ നേതാക്കളെ മാത്രം പരിഗണിച്ചാല്‍ മതിയെന്നതാണ് മറ്റൊരു വ്യവസ്ഥ. എല്ലാ ബ്ലോക്കുകളിലും പുതുമുഖങ്ങള്‍ ബ്ലോക്ക് പ്രസിഡന്റുമാരായി വരും. അര്‍ദ്ധസര്‍ക്കാര്‍ സ്ഥാപനങ്ങളിലും സഹകരണ ബാങ്കുകളിലും ജോലിയുള്ളവരെയും തദ്ദേശ സ്ഥാപനങ്ങളിലെ അധ്യക്ഷ, ഉപാധ്യക്ഷ സ്ഥാനങ്ങളിലിരിക്കുന്നവരെയും ജില്ലാപഞ്ചായത്ത് അംഗങ്ങളെയും ഡി.സി.സി. ഭാരവാഹികളും ബ്ലോക്ക് പ്രസിഡന്റുമാരുമാക്കില്ല.
പ്രായപരിധി പിന്നിട്ട യൂത്ത് കോണ്‍ഗ്രസ് നേതാക്കളെയും ഐ.എന്‍.ടി.യു.സി. ജില്ലാ ഭാരവാഹികളെയും കോണ്‍ഗ്രസ് നേതൃസ്ഥാനങ്ങളിലേക്ക് കൊണ്ടുവരും. വലിയ ജില്ലകളില്‍ 25 ഭാരവാഹികളും 26 എക്‌സിക്യുട്ടീവ് അംഗങ്ങളുമുണ്ടാകും. ഇവിടങ്ങളില്‍ നാലുവൈസ് പ്രസിഡന്റുമാരും ഒരുട്രഷററും 20 ജനറല്‍ സെക്രട്ടറിമാരുമുണ്ടാകും.
ഭാരവാഹികളില്‍ രണ്ടുപേര്‍ വനിതകളും ഒരാള്‍ പട്ടികജാതിവിഭാഗത്തില്‍നിന്നും ഒരാള്‍ പട്ടികവര്‍ഗവിഭാഗത്തില്‍നിന്നുമായിരിക്കണം. ചെറിയ ജില്ലകളില്‍ മൂന്നു വൈസ് പ്രസിഡന്റുമാര്‍, ഒരു ട്രഷറര്‍, 11 ജനറല്‍ സെക്രട്ടറിമാര്‍ എന്നിങ്ങനെയാണ് ഭാരവാഹികളുടെ എണ്ണം. പത്തനംതിട്ട, ഇടുക്കി, വയനാട്, കാസര്‍കോട് എന്നിവയാണ് ചെറിയ ജില്ലകള്‍. നിലവില്‍ പല ജില്ലകളിലും 70 മുതല്‍ 100 വരെ കോണ്‍ഗ്രസ് ഭാരവാഹികളുണ്ട്.
