വീണ്ടും പൊട്ടിതെറി, മുതിര്ന്ന കോണ്ഗ്രസ് നേതാവും മുന് കെപിസിസി അധ്യക്ഷനുമായ വി എം സുധീകരന് രാജിവച്ചു. കെപിസിസി രാഷ്ട്രീയ കാര്യ സമിതിയില് നിന്നും രാജിവച്ചുകൊണ്ടുള്ള കത്ത് കെപിസിസി അധ്യക്ഷന് കെ സുധാകരന് കൈമാറി.
പാര്ട്ടിയില് സമീപകാലത്തുണ്ടായ പുനഃസംഘടന ഉള്പ്പെടെയുള്ള നടപടികളില് കടുത്ത അതൃപ്തിയാണ് സുധീരന് ഉണ്ടായിരുന്നത്. കെപിസിസി രാഷ്ട്രീയ കാര്യ സമിതി അംഗം എന്ന നിലയിലും മുന് കെപിസിസി അധ്യക്ഷന് എന്നീ നിലകളില് പ്രവര്ത്തിച്ചിട്ടുള്ള തന്നെ പാര്ട്ടി നേതൃത്വം അവഗണിക്കുന്നു എന്ന കാര്യം അടുത്ത കേന്ദ്രങ്ങളോട് അദ്ദേഹം പല തവണ ഇക്കാര്യം സൂചിപ്പിച്ചിരുന്നു. പാര്ട്ടിയില് കൂടിയാലോചനകള് ഇല്ലെന്ന ആക്ഷേപം നിരന്തരം ഉന്നയിച്ചിരുന്ന വ്യക്തി കൂടിയായിരുന്നു അദ്ദേഹം. ഏകപക്ഷീയമായി തീരുമാനങ്ങള് എടുക്കുന്നതില് ഹൈക്കമാന്റില് അതൃപ്തി അറിയിച്ചിരുന്നു. എന്നാല്, ആരോഗ്യ പ്രശ്നങ്ങളെ തുടര്ന്നാണ് രാജി എന്നാണ് കെപിസിസി നല്കുന്ന വിശദീകരണം.
സാധാരണ പ്രവര്ത്തകനായി തുടരുമെന്ന് അദ്ദേഹം വ്യക്തമാക്കി. മുന് കെപിസിസി അധ്യക്ഷനായിരുന്നു സുധീരന്. കോണ്ഗ്രസ് പുനഃസംഘടനയില് പ്രതികരിക്കില്ലെന്നായിരുന്നു അദ്ദേഹത്തിന്റെ നിലപാട്. ഇതിലും വലിയ സ്ഥാനങ്ങള് സുധീരന് രാജിവച്ചിട്ടുണ്ടെന്ന് രാജ്മോഹന് ഉണ്ണിത്താന് എംപി പ്രതികരിച്ചു.
ഇന്നലെ വൈകീട്ടാണ് വി.എം സുധീരന് രാജിക്കത്ത് കൈമാറിയത്. കെ.പി.സി.സി പ്രസിഡന്റിന് നേരിട്ടാണ് രാജി നല്കിയത്. വിഷയത്തില് പ്രതികരിക്കാനില്ലെന്നു വി എം സുധീരന് അറിയിച്ചു.
അതേസമയം, കെപിസിസി പുനഃസംഘടനാ ചര്ച്ചകളുടെ ഭാഗമായി സംസ്ഥാനത്തിന്റെ ചുമതലയുള്ള എ.ഐ.സി.സി ജനറല് സെക്രട്ടറി താരിഖ് അന്വര് ഇന്ന് കേരളത്തിലെത്തും. ഉച്ചയോടെ കൊച്ചിയിലെത്തുന്ന അദ്ദേഹം പ്രതിപക്ഷ നേതാവ് വി.ഡി. സതീശനടക്കമുള്ള നേതാക്കളുമായി ചര്ച്ച നടത്തും. പുനഃസംഘടന ഈ മാസം 30ന് അകം പൂര്ത്തിയാക്കാനുള്ള നീക്കങ്ങളാണ് നേതൃതലത്തില് നടക്കുന്നത്.
കെപിസിസി ഡിസിസി പുനഃസംഘടനയുടെ ഭാഗമായുള്ള നേതൃതല ചര്ച്ചകള്ക്കായാണ് താരിഖ് അന്വറിന്റെ കേരള സന്ദര്ശനം. ഡിസിസി പ്രസിഡന്റുമാരുടെ പട്ടിക പുറത്തുവന്നതിന് പിന്നാലെയുണ്ടായ പൊട്ടിത്തെറിക്ക് പിന്നാലെ നേതാക്കളെ അനുനയിപ്പിച്ചെങ്കിലും സ്ഥിതിഗതികള് അദ്ദേഹം അവലോകനം ചെയ്യും. ഇന്ന് കൊച്ചിയില് പ്രതിപക്ഷ നേതാവ് വി.ഡി. സതീശനടക്കമുള്ള നേതാക്കളുമായി ചര്ച്ച നടത്തുന്ന താരിഖ് അന്വര്, നാളെയും മറ്റന്നാളും മുതിര്ന്ന നേതാക്കളെ ഉള്പ്പെടെ കാണും.
എ,ഐ ഗ്രൂപ്പുകള് കെപിസിസി ഭാരവാഹി പട്ടികയിലേയ്ക്ക് പരിഗണിക്കേണ്ടവരുടെ പേരുകള് കെ.സുധാകരന് കൈമാറിയിട്ടുണ്ട്. താരിഖ് അന്വറുമായുള്ള കൂടിക്കാഴ്ചയില് ഉമ്മന് ചാണ്ടിയും ചെന്നിത്തലയും സമ്മര്ദ്ദം ചെലുത്തുമെന്നാണ് സൂചന. ഗ്രൂപ്പ് പ്രതിനിധികളെ ഭാരവാഹി പട്ടികയില് ഉള്പ്പെടുത്തി അനുനയ നീക്കമാണ് കെപിസിസി നേതൃത്യവും ലക്ഷ്യമിടുന്നത്.
പുനഃസംഘടന ഈ മാസം 30ന് അകം പൂര്ത്തിയാക്കാനുള്ള നീക്കങ്ങളുമായാണ് സംസ്ഥാന നേതൃത്വം മുന്നോട്ട് പോകുന്നത്. താഴേത്തട്ടില് കോണ്ഗ്രസ് യൂണിറ്റ് കമ്മിറ്റികള് രൂപീകരിക്കുന്നതുമായി ബന്ധപ്പെട്ട നടപടികളും പുരോഗമിക്കുകയാണ്. ഇതിന്റെ ഭാഗമായി നെയ്യാര് ഡാമില് നടക്കുന്ന പ്രവര്ത്തക ശില്പശാലയുടെ സമാപനച്ചടങ്ങില് താരിഖ് അന്വര് പങ്കെടുക്കും. നിലവിലെ കെപിസിസിയുടെ പ്രവര്ത്തനങ്ങളില് ഹൈക്കമാന്ഡ് തൃപ്തരാണ്. എന്നാല് നേതാക്കള് പാര്ട്ടി വിട്ടുപോകാതെ അനുനയ സമീപനം ഉണ്ടാകണമെന്നാണ് നിര്ദ്ദേശം.
