മൂവാറ്റുപുഴ: മധ്യ പ്രദേശിലെ ഇന്‍ഡോറില്‍ നടന്ന 25 മത് ദേശീയ ബധിര കായികമേളയില്‍ സ്വര്‍ണ്ണ മെഡല്‍ നേടിയ ഈസ്റ്റ് വാഴപ്പിള്ളി അസീസി വിദ്യാലയത്തിലെ എട്ടാം ക്ലാസ് വിദ്യാര്‍ത്ഥിയും മുളവൂര്‍ അപ്പയ്ക്കല്‍ അസീസിന്റെയും നിഷയുടെയും മകനായ മുഹമ്മദ് മുബാറക്കിന് മുളവൂര്‍ പൊന്നിരിക്കപ്പറമ്പ് പൗരസമിതിയുടെ നേതൃത്വത്തില്‍ സ്വീകരണം നല്‍കി. അണ്ടര്‍ 14 ആണ്‍കുട്ടികളുടെ വിഭാഗത്തിലാണ് മുഹമ്മദ് മുബാറക്ക് ഷോട്ട്പുട്ടില്‍ സ്വര്‍ണ്ണ മെഡല്‍ നേടിയത്.
ശിങ്കാരിമേളത്തിന്റെയും നാസിക് ഡോളിന്റെയും താളമേളത്തോടെയാണ് പൗര സമിതിയുടെ നേതൃത്വത്തില്‍ സ്വീകരണ സമ്മേളനം ഒരുക്കിയത്. മധുര പലഹാരങ്ങളും ശീതള പാനിയങ്ങളും വിതരണം ചെയ്ത് സ്വീകരണ സമ്മേളനം ജന്മനാട് ആഘോഷമാക്കി മാറ്റി. മുഹമ്മദ് മുബാറക്കിന് മൊമന്റോയും ക്യാഷ് അവാര്‍ഡും നല്‍കിയാണ് ആദരിച്ചത്. സമ്മേളനം പഞ്ചായത്ത് പ്രസിഡന്റ് മാത്യൂസ് വര്‍ക്കി ഉദ്ഘാടനം ചെയ്തു. വാര്‍ഡ് മെമ്പര്‍ ഇ.എം.ഷാജി അധ്യക്ഷത വഹിച്ചു. ചടങ്ങില്‍ മുളവൂര്‍ സെന്‍ട്രല്‍ ജുമാ മസ്ജിദ് ഇന്ററിം മുതവല്ലി കെ കെ യൂനുസിനെ പൗരസമിതിക്ക് വേണ്ടി പി വി റോയി പൊന്നാട അണിയിച്ച് സ്വീകരിച്ചു. ബ്ലോക്ക് പഞ്ചായത്ത് മെമ്പര്‍ ഒ.കെ.മുഹമ്മദ്, പഞ്ചായത്ത് മെമ്പര്‍ ബെസ്സി എല്‍ദോ, സ്വീഡ് ആര്‍ക്കിടെക്റ്റ് കോളേജ് ഡയറക്ടര്‍ യൂസഫ് മുളാട്ട്, മുന്‍ പഞ്ചായത്ത് വൈസ് പ്രസിഡന്റ് യു.പി.വര്‍ക്കി, പി.വി.റോയി, മൈതീന്‍ മരങ്ങാട്ട്, എന്നിവര്‍ സംസാരിച്ചു. കെ.എ.രാജന്‍, എം.കെ.ഇബ്രാഹിം, ടി.എം.സാദിഖ്, ഡോ.വിജയലക്ഷ്മി, സിംപിള്‍ സിദ്ധീഖ്, എ.ഇ.ഗോപാലന്‍, എന്‍.കെ.അലി, സലാം ബ്ലാങ്കര, ബി.എ.ഐഷ എന്നിവര്‍ നേതൃത്വം നല്‍കി.
