ലാവ്ലിന് കേസുമായി ബന്ധപ്പെട്ട ഹര്ജികള് വ്യാഴാഴ്ച പരിഗണിക്കും. ചീഫ് ജസ്റ്റിസ് യുയു ലളിത് അധ്യക്ഷനായ ബെഞ്ച് ആണ് ഹര്ജികള് പരിഗണിക്കുന്നത്. കേസില് പിണറായി വിജയനെ കുറ്റവിമുക്തനാക്കിയതിനെതിരെ സിബിഐ നല്കിയതുള്പ്പടെയുള്ള ഹര്ജികളാണ് സുപ്രീം കോടതിയുടെ പരിഗണനയിലുള്ളത്.
മുപ്പതിലേറെ തവണ കേസുമായി ബന്ധപ്പെട്ട ഹര്ജികള് മാറ്റിവെച്ചിരുന്നു. എസ്എന്സി ലാവ്ലിനുമായി ബന്ധപ്പെട്ട വിവിധ ഹര്ജികള് ചീഫ് ജെസ്റ്റിസ് അധ്യക്ഷനായ ബെഞ്ച് വ്യാഴാഴ്ച പരിഗണിക്കുന്ന എട്ടാമത്തെ കേസാണ്. നേരത്തെ സെപ്റ്റംബര് പതിമൂന്നിന് ലാവലിന് കേസുമായി ബന്ധപ്പെട്ട ഹരജികള് പരിഗണിക്കുമെന്നായിരുന്നു ചീഫ് ജസ്റ്റിസ് യുയു ലളിത് പറഞ്ഞിരുന്നത്.
എന്നാല് അന്ന് അദ്ദേഹം ഭരണഘടനാ ബെഞ്ചിന്റെ ഭാഗമായിരുന്നതിനാല് ഹര്ജികള് പരിഗണിക്കാന് കഴിഞ്ഞിരുന്നില്ല. സ്വര്ണ്ണക്കടത്ത് കേസിന്റെ വിചാരണ ബംഗളൂരുവിലേക്ക് മാറ്റണമെന്ന് ആവശ്യപ്പെട്ടുള്ള ഹര്ജികള് അതേ ദിവസം ചീഫ് ജസ്റ്റിസ് അധ്യക്ഷനായ ബെഞ്ച് പരിഗണിക്കും.
