തിരുവനന്തപുരം: കൊച്ചിയില്‍ ഏപ്രില്‍ 25ന് ബിജെപി സംഘടിപ്പിക്കുന്ന യുവാക്കളുടെ സംവാദത്തില്‍ പ്രധാനമന്ത്രി നരേന്ദ്രമോദി പങ്കെടുക്കും. ‘യുവം’ എന്ന പേരിലാണ് പരിപാടി നടക്കുക. ഒരു ലക്ഷത്തോളം പേര്‍ പരിപാടിയില്‍ പങ്കെടുക്കുമെന്ന് സംഘാടകര്‍ അറിയിച്ചു.
ബിജെപിയില്‍ ചേര്‍ന്ന അനില്‍ കെ ആന്റണിയെയും ഈ പരിപാടിയില്‍ ബിജെപി പങ്കെടുപ്പിക്കും. കന്നഡ താരം യാഷ്, ക്രിക്കറ്റ് താരം രവീന്ദ്ര ജഡേജ എന്നിവരും മോദിയോടൊപ്പം പരിപാടിയില്‍ പങ്കെടുക്കും. കേരളത്തില്‍ അനില്‍ കെ ആന്റണി പങ്കെടുക്കുന്ന ബിജെപിയുടെ പ്രധാന വേദിയായിരിക്കും ‘യുവം’.
വ്യാഴാഴ്ച ഉച്ചകഴിഞ്ഞ് ന്യൂഡല്‍ഹിയിലെ ബിജെപി ആസ്ഥാനത്ത് വെച്ചായിരുന്നു എ കെ ആന്റണിയുടെ മകനായ അനില്‍ ആന്റണി ബിജെപിയില്‍ ചേര്‍ന്നത്. പാര്‍ട്ടി സംസ്ഥാന അദ്ധ്യക്ഷന്‍ കെ സുരേന്ദ്രനൊപ്പമെത്തിയാണ് കേന്ദ്രമന്ത്രി പീയൂഷ് ഗോയലില്‍ നിന്നും അനില്‍ ആന്റണി അംഗത്വം സ്വീകരിച്ചത്. ചടങ്ങില്‍ കേന്ദ്രമന്ത്രി വി മുരളീധരനും സന്നിഹിതനായിരുന്നു.
