ജീവന് കൊടുത്തും യുഡിഎഫ് മത്സ്യത്തൊഴിലാളികള്ക്ക് ഒപ്പം നില്ക്കുമെന്നും അവരുടെ സമരത്തെ പിന്തുണയ്ക്കുന്നതായും പ്രതിപക്ഷ നേതാവ് വി.ഡി സതീശന്. മുഖ്യമന്ത്രി സമരക്കാരുമായി ചര്ച്ച നടത്താത്തത് തങ്ങളെ അതിശയിപ്പിക്കുന്നു. മന്ത്രിമാര്ക്ക് പ്രശ്നം തീര്ക്കാന് കഴിയണമെന്നും മുഖ്യമന്ത്രി ചര്ച്ച നടത്തണമെന്നും വിഴിഞ്ഞം വിഷയത്തില് നിയമസഭയില് നടന്ന അടിയന്തര പ്രമേയ ചര്ച്ചയില് സതീശന് ആവശ്യപ്പെട്ടു.
കേരളത്തിലിന്ന് ആദിവാസികളെ പോലെയോ അവരേക്കാള് കൂടുതലോ ദുരിതവും കഷ്ടപ്പാടുകളും നേരിടുന്നവരാണ് മത്സ്യത്തൊഴിലാളികള്. എല്ലാ തീരപ്രദേശത്തും പട്ടിണിയാണ്. ഇപ്പോള് കാണുന്ന തീരപ്രദേശത്തെ വീടുകള് മൂന്നുമാസം കഴിയുമ്പോള് അവിടെയുണ്ടാകില്ല. വീടിരുന്ന സ്ഥലത്ത് കടലാണ്. കാലാവസ്ഥയിലുണ്ടായ മാറ്റം വലിയ പ്രശ്നങ്ങളുണ്ടാക്കുന്നു. ഓഖിക്ക് ശേഷം മത്സ്യബന്ധന ദിനങ്ങളുടെ എണ്ണം 46 ശതമാനം കുറഞ്ഞു. ഇങ്ങനെ പ്രയാസങ്ങള് അനുഭവിച്ചു കൊണ്ടിരിക്കുകയാണ് മത്സ്യത്തൊഴിലാളികള്.
ഈ യാഥാര്ഥ്യം കൂടി ഉള്ക്കൊണ്ടു വേണം ഒരു സര്ക്കാര് ഇതിനെ സമീപിക്കാന്. സെക്രട്ടറിയേറ്റിന് മുന്നിലെ സമരക്കാരെ നേരിടുന്ന ലാഘവത്തോടെയാണോ തീരദേശത്തെ മത്സ്യത്തൊഴിലാളികളുടെ സമരത്തെ നേരിടേണ്ടത്. അവരുടെ തീവ്രത കൂടും. അതേത് പൊതുപ്രവര്ത്തകനും മാധ്യമ പ്രവര്ത്തകനുമാണ് അറിയാത്തത്? സ്നേഹിച്ചാല് ജീവന് തരുന്നവരാണ് മത്സ്യത്തൊഴിലാളികള്.
വര്ഗീയ വിവേചനത്തിന് ഇടവരാത്ത തരത്തില് പ്രശ്നം പരിഹരിക്കേണ്ടത് ആയിരുന്നു. ബിഷപ്പിന് എതിരെ കേസെടുത്തത് എന്ത് അടിസ്ഥാനത്തിലാണ്?. കേസെടുത്തപ്പോള് സ്വാഭാവിക പ്രകോപനം ഉണ്ടായി. മന്ത്രിയുടെ സഹോദരന് പോലും തീവ്രവാദിയാണെന്ന് പാര്ട്ടിയെ മുഖപത്രം പറയുന്നു. മന്ത്രിയ്ക്ക് എതിരെയുള്ള പരാമര്ശം വൈദികന് പിന്വലിച്ചിട്ടും ആളിക്കത്തിക്കാന് ശ്രമം നടത്തുന്നു. ജനങ്ങള്ക്കിടയില് ഭിന്നിപ്പ് ഉണ്ടാക്കാനാണ് സര്ക്കാര് ഇതിലൂടെ ശ്രമിക്കുന്നത്. മുഖ്യമന്ത്രി മുന്കൈ എടുത്താല് സമരം തീരും. സമര സമിതിയുമായി മുഖ്യമന്ത്രി ചര്ച്ച നടത്താത്തത് അത്ഭുതപ്പെടുത്തുന്നു’- വി.ഡി സതീശന് പറഞ്ഞു.
വട്ടി പലിശയ്ക്ക് എടുത്തുകൊണ്ട് മണ്ണെണ്ണ വാങ്ങേണ്ട ഗതികേടിലാണ് മത്സ്യത്തൊഴിലാളികള്. സബ്സിഡി വര്ധിപ്പിക്കാന് സര്ക്കാര് തയ്യാറാകണമെന്നും വി.ഡി സതീശന് ചൂണ്ടിക്കാട്ടി. ജീവന് കൊടുത്തും മത്സ്യത്തൊഴിലാളികള്ക്ക് ഒപ്പം പ്രതിപക്ഷം നില്ക്കുമെന്നും സമരം തീര്ക്കാന് മുഖ്യമന്ത്രി ഇടപെടണമെന്ന് അപേക്ഷിക്കുന്നതായും വി ഡി സതീശന് സഭയില് വ്യക്തമാക്കി.