ബി.ജെ.പിയ്ക്കെതിരായ അവിശ്വാസം പാളി
പാലക്കാട്: അവിശ്വാസം പരിഗണിക്കുന്നതിന് തൊട്ടുമുമ്പ് കോണ്‍ഗ്രസ് അംഗം നാടകീയമായി രാജിവച്ചു. ഇതോടെ അവിശ്വാസം പരാജയപ്പെടുമെന്ന് ഉറപ്പായി. പാലക്കാട് നഗരസഭയിലാണ് ബി.ജെ.പി അംഗങ്ങളായ നഗരസഭ അദ്ധ്യക്ഷയ്ക്കും ഉപാദ്ധ്യക്ഷനുമെതിരെ യു.ഡി.എഫ് കൊണ്ടുവന്ന അവിശ്വാസം പ്രമേയം പരിഗണിക്കുന്നതിന് തൊട്ടുമുമ്പേ നാടകീയ രാജി. അദ്ധ്യക്ഷയ്ക്കെതിരായ പ്രമേയം രാവിലെ ഒമ്പത് മണിക്ക് ചര്‍ച്ചയ്ക്ക് എടുക്കാനിരിക്കെയാണ് കോണ്‍ഗ്രസ് കൗണ്‍സിലര്‍ വി.ശരവണന്‍ രാജിവച്ചൊഴിഞ്ഞത്.
കക്ഷിനില: ബി.ജെ.പി 24, കോണ്‍ഗ്രസ് 13, മുസ്ലീം ലീഗ് നാല്, സി.പി.എം ഒമ്പത്, വെല്‍ഫെയര്‍ പാര്‍ട്ടി ഒന്ന്, സ്വതന്ത്രന്‍ ഒന്ന് എന്നിങ്ങനെയാണ് കക്ഷിനില. സ്വതന്ത്രനായി വിജയിച്ച വ്യക്തിക്ക് തിരഞ്ഞെടുപ്പ് കേസ് ഉള്ളതിനാല്‍ വോട്ടവകാശം ഇല്ല.
52 അംഗങ്ങളുള്ള നഗരസഭയില്‍ അവിശ്വാസം പാസാകാന്‍ 27 അംഗങ്ങളുടെ പിന്തുണവേണം. സി.പി.എമ്മും വെല്‍ഫെയര്‍ പാര്‍ട്ടിയും പിന്തുണച്ചാലേ അവിശ്വാസം വിജയിക്കൂ. ആരുടെയെങ്കിലും വോട്ട് അസാധുവായാലും അവിശ്വാസം പരാജയപ്പെടും. അവിശ്വാസ പ്രമേയ അവതരണത്തില്‍ നിന്ന് വിട്ടുനില്‍ക്കാനാണ് ബി.ജെ.പി തീരുമാനം. പ്രമേയത്തെ അനുകൂലിക്കണമെന്നാവശ്യപ്പെട്ട് യു.ഡി.എഫ് അംഗങ്ങള്‍ക്ക് വിപ്പ് നല്‍കിയിട്ടുണ്ട്. എന്നാല്‍, സി.പി.എമ്മിന്റെ തീരുമാനം ഇന്ന് രാവിലെ നടക്കുന്ന യോഗത്തിന് ശേഷമേ അറിയാന്‍ സാധിക്കൂ. സ്ഥിരംസമിതി അധ്യക്ഷ സ്ഥാനങ്ങളിലേക്ക് നടന്ന അവിശ്വാസത്തിലും തിരഞ്ഞെടുപ്പിലും സ്വീകരിച്ച നിലപാട് തന്നെ സി.പി.എം തുടരുമെന്നാണ് സൂചന. കഴിഞ്ഞ നഗരസഭാ യോഗത്തില്‍ അഞ്ച് കോണ്‍ഗ്രസ് അംഗങ്ങളെ അധ്യക്ഷ മൂന്ന് മാസത്തേക്ക് സസ്പെന്റ് ചെയ്തിരുന്നു. സസ്പെന്ഷന് ഇപ്പോഴും നിലനില്‍ക്കുന്നതായാണ് ബി.ജെ.പി വാദം. അംഗങ്ങള്‍ക്ക് നല്‍കിയ മിനുട്സിലും സസ്പെന്ഷന് കാലാവധി രേഖപ്പെടുത്തിയിട്ടില്ല.
