തിരുവനന്തപുരം: ഒടുവില്‍ എ.ഡി.ജി.പി. എം.ആര്‍. അജിത് കുമാറിനെ കൈവിട്ട് മുഖ്യമന്ത്രി പിണറായി വിജയന്‍. ക്രമസമാധാന ചുമതലയുള്ള പുതിയ എഡിജിപിയായി മനോജ് ഏബ്രഹാമിനെ നിയമിച്ചു. അസാധാരണമായിട്ടാണ് മുഖ്യമന്ത്രി പിണറായി വിജയന്‍ ഞായറാഴ്ച ദിനത്തില്‍ സെക്രട്ടേറയറ്റില്‍ എത്തുന്നത്. ചുമതലമാറ്റ ഫയലുകളില്‍ ഒപ്പിടാനായി 20 മിനിറ്റോളം മുഖ്യമന്ത്രി സെക്രട്ടേറിയറ്റില്‍ ചെലവഴിച്ചതായാണ് വിവരം. ബറ്റാലിയന്റെ ചുമതലയാണ് അജിത്കുമാറിന് ലഭിക്കുക.
കഴിഞ്ഞ കുറേ നാളുകളായി പി.വി. അന്‍വര്‍ എം.എല്‍.എ. അജിത് കുമാറിനെതിരേ ശക്തമായ വിമര്‍ശനങ്ങളുമായി രംഗത്തെത്തിയിരുന്നു. എല്‍.ഡി.എഫില്‍ നിന്ന് പിണങ്ങി പുതിയ പാര്‍ട്ടി രൂപീകരിക്കുന്നതിലേക്ക് വരെ എഡിജിപിയുമായി ബന്ധപ്പെട്ട വിഷയങ്ങള്‍ പിവി അന്‍വറിനെ എത്തിച്ചിരുന്നു. എ.ഡി.ജി.പി. അജിത് കുമാര്‍ – ആര്‍.എസ്.എസ്. നേതാക്കളുമായുള്ള കൂടിക്കാഴ്ചയുമായി ബന്ധപ്പെട്ട കാര്യങ്ങള്‍ പ്രതിപക്ഷനേതാവ് വി.ഡി. സതീശന്‍ ഉന്നയിച്ചതിനു പിന്നാലെ ശക്തമായി പി.വി. അന്‍വര്‍ ഉന്നയിച്ചിരുന്നു. തൃശ്ശൂര്‍പ്പൂരം കലക്കല്‍ ആരോപണവും എ.ഡി.ജി.പിക്കെതിരേ ശക്തമായിരുന്നു. എ.ഡി.ജി.പിയെ മാറ്റിയേ തീരൂ എന്ന നിലപാടില്‍ സി.പി.ഐയും രംഗത്തെത്തിയിരുന്നു.
എന്നാല്‍ ഡി.ജി.പിയുടെ നേതൃത്വത്തില്‍ നടത്തുന്ന പ്രത്യേകാന്വേഷണത്തിന് ശേഷം മാത്രമേ എ.ഡി.ജിപിക്കെതിരേ നടപടി ഉണ്ടാകൂ എന്നായിരുന്നു മുഖ്യമന്ത്രിയുടെ നിലപാട്.
