ന്യൂഡല്ഹി: കേന്ദ്ര ആഭ്യന്തര മന്ത്രി അമിത് ഷായെ വിമര്ശിച്ച് ഇന്ത്യന് എക്സ്പ്രസ് ദിനപത്രത്തില് ലേഖനമെഴുതിയ സിപിഎം നേതാവും രാജ്യസഭ എം പിയുമായ ജോണ് ബ്രിട്ടാസിന് കാരണം കാണിക്കല് നോട്ടീസ്. രാജ്യസഭ ചെയര്മാനും വൈസ് പ്രസിഡന്റുമായ ഉപരാഷ്ട്രപതി ജഗദീപ് ധന്കര് ആണ് ബ്രിട്ടാസിന് നോട്ടീസ് നല്കിയത്. പത്രത്തിലെ ലേഖനത്തിനെതിരായ പരാതിയിലാണ് നടപടി.
ലേഖനത്തിന്റെ ഉള്ളടക്കം രാജ്യദ്രോഹപരം ആണെന്ന ബിജെപി നേതാവിന്റെ പരാതിയിലാണ് നോട്ടീസ്. ലേഖനത്തെ സംബന്ധിച്ച വിശദീകരണം രേഖാമൂലം നല്കണമെന്നാണ് കത്തിലെ ആവശ്യം. കേരളത്തില് നിന്നുള്ള ബിജെപി നേതാവ് പി സുധീര് നല്കിയ പരാതിയിലാണ് നടപടി. കര്ണാടകയിലെ തിരഞ്ഞെടുപ്പ് പ്രചാരണത്തിനിടെ നിങ്ങളുടെ അടുത്തുള്ള പ്രദേശം കേരളമാണെന്നും അതിനാല് ബിജെപിക്ക് വോട്ട് ചെയ്താല് മാത്രമേ രക്ഷയുള്ളുവെന്നും അമിത് ഷാ പറഞ്ഞിരുന്നു. ഇതിനെതിരായിട്ടായിരുന്നു ഫെബ്രുവരി 20-ന് ഇന്ത്യന് എക്സ്പ്രസ് ദിനപത്രത്തില് പ്രസിദ്ധീകരിച്ച ബ്രിട്ടാസിന്റെ ലേഖനം.
ലേഖനത്തിന്റെ പേരില് തനിക്ക് എതിരെ പരാതി നല്കിയത് വിചത്രമായ സംഭവമാണെന്ന് ജോണ് ബ്രിട്ടാസ് പ്രതികരിച്ചു. രാജ്യസഭ ചെയര്മാന് നല്കിയ പരാതിയുടെ സ്വഭാവം തന്നെ അപലപിക്കപ്പെടേണ്ടതാണെന്ന് നടപടിയില് ജോണ് ബ്രിട്ടാസ് പറഞ്ഞു. രാജ്യസഭ ചെയര്മാന് ഇക്കാര്യത്തില് മറുപടി നല്കുമെന്ന് പ്രതീക്ഷിക്കുന്നു. മൗലികവകാശങ്ങളെ കുറിച്ച് നല്ല ബോധ്യമുള്ള നമ്മുടെ ചെയര്മാന് എന്റെ അവകാശങ്ങളും സംരക്ഷിക്കുമെന്നാണ് പ്രതീക്ഷിക്കുന്നതെന്ന് ബ്രിട്ടാസ് പറഞ്ഞു.