കോവിഡ് രൂക്ഷമായി തുടരുന്നതിനിടെയും പുതിയ നീക്കവുമായി ചൈന. വിദേശത്ത് നിന്നെത്തുന്ന യാത്രക്കാര്‍ക്ക് ഏര്‍പ്പെടുത്തിയിരുന്ന നിര്‍ബന്ധിത ക്വാറന്റീന്‍ നിബന്ധന പിന്‍വലിച്ചു. ജനുവരി എട്ട് മുതല്‍ ഇത് പ്രാബല്യത്തില്‍ വരും. എന്നാല്‍ കോവിഡ് പരിശോധനയ്ക്ക് വിധേയമാവണം. ചൈന പ്രഖ്യാപിച്ച സിറോ കൊവിഡ് ടോളറന്‍സ് നയത്തിന്റെ ഭാഗമായി ഏര്‍പ്പെടുത്തിയ അവസാന നിബന്ധനയായിരുന്നു ഇത്. അഞ്ച് ദിവസമാണ് രാജ്യത്തെത്തുന്ന വിദേശീയര്‍ക്ക് നിര്‍ബന്ധിത ക്വാറന്റീന്‍.
ഇതോടൊപ്പം വീസ അനുവദിക്കുന്നതിന് ഏര്‍പ്പെടുത്തിയ നിയന്ത്രണങ്ങളെല്ലാം നീക്കുമെന്നും ചൈന പ്രഖ്യാപിച്ചു. പഠന വിസയുള്ളവര്‍ക്കും കുടുംബത്തെ സന്ദര്‍ശിക്കാനെത്തുന്ന വിദേശികള്‍ക്കും പുതിയ നിയമം ഏറെ ഗുണം ചെയ്യും. ജനുവരി 8 മുതല്‍ വിദേശ യാത്രയ്ക്ക് ചൈനീസ് പൗരന്മാര്‍ക്കും വിസയ്ക്ക് അപേക്ഷിക്കാനാവുമെന്ന് ഇമിഗ്രേഷന്‍ അതോറിറ്റി അറിയിച്ചു.
അതേസമയം നിയന്ത്രണങ്ങള്‍ പിന്‍വലിച്ചതോടെ ചൈനയില്‍ കോവിഡ് രോഗികളുടെ എണ്ണത്തില്‍ ക്രമാതീതമായ വര്‍ധനവാണ് രേഖപ്പെടുത്തുന്നത്. ആശുപത്രികള്‍ നിറഞ്ഞിരിക്കുകയാണെന്നാണ് പുറത്തു വരുന്ന റിപ്പോര്‍ട്ടുകള്‍. ഔദ്യോഗികമായി കണക്കുകള്‍ പുറത്തുവിടുന്നില്ലെങ്കിലും നിലവില്‍ പത്ത് ലക്ഷത്തിലേറെ രോഗബാധിതരുണ്ടെന്നാണ് റിപ്പോര്‍ട്ട്. ബ്രിട്ടീഷ് ആരോഗ്യ സംഘടനയായ ‘എയര്‍ഫിനിറ്റി’ പുറത്തുവിടുന്ന വിവരം. ദിവസം അയ്യായിരത്തിലേറെ കൊവിഡ് മരണം ചൈനയില്‍ ഉണ്ടാകുന്നുണ്ടെന്നാണ്
മൂന്ന് വര്‍ഷത്തെ ലോക്ക്ഡൗണ്‍, അടച്ച അതിര്‍ത്തികള്‍,നിര്‍ബന്ധിത ക്വാറന്റീന്‍ എന്നിവയ്ക്ക് ശേഷം ‘കോവിഡിനൊപ്പം ജീവിക്കുക’ എന്നതിലേക്ക് നീങ്ങുന്ന ലോകത്തിലെ അവസാനത്തെ പ്രധാന സമ്പദ്വ്യവസ്ഥയാണ് ചൈന. 2020 മാര്‍ച്ച് മുതല്‍, ചൈനയിലേക്ക് പ്രവേശിക്കുന്ന ഏതൊരാള്‍ക്കും നിര്‍ബന്ധിത ക്വാറന്റീന്‍ ഏര്‍പ്പെടുത്തിയിരുന്നു.
