ഒളിമ്പിക്സ് ടെന്നീസില്‍ ഇന്ത്യക്ക് തിരിച്ചടി. ആദ്യ റൗണ്ടില്‍ തന്നെ ഇന്ത്യയുടെ ടെന്നീസ് ഡബിള്‍സ് സഖ്യം പുറത്തായി. വനിതകളുടെ ടെന്നിസ് ഡബിള്‍സില്‍ ഇന്ത്യയെ പ്രതിനിധീകരിച്ച സാനിയ മിര്‍സ- അങ്കിത റെയ്‌ന സഖ്യമാണ് ആദ്യ റൗണ്ടില്‍ തന്നെ പരാജയപ്പെട്ടത്. യുക്രെയ്‌നിന്റെ ല്യുദ്മില കിചെനോക്- നാദിയ കിചെനോക് സഹോദരിമാരാണ് സാനിയ- അങ്കിത സഖ്യത്തെ തോല്‍പ്പിച്ചത്. സ്‌കോര്‍ 6-0, 6-7, 8-10.
ആദ്യ റൗണ്ടില്‍ ഏകപക്ഷീയമായ വിജയം സ്വന്തമാക്കിയ സാനിയ സഖ്യത്തിന് രണ്ടാം സെറ്റ് ടൈബ്രേക്കറിലെത്തിയതോടെയാണ് കളി കൈവിട്ടു തുടങ്ങിയ്. രണ്ടാം റൗണ്ടിലെ പോരാട്ടത്തില്‍ 6-7ന് ആയിരുന്നു യുക്രെയ്ന്‍ ടീമിന്റെ വിജയം. ഒളിമ്പിക്‌സിലെ കന്നി അങ്കമായിരുന്നു കിചെനോക് നാദിയ കിചെനോക് സഹോദരിമാരുടേത്. അതേസമയം സാനിയ- അങ്കിത സഖ്യം ഒരുമിച്ച് ഇറങ്ങുന്നതും ആദ്യമായായിരുന്നു.
ടെന്നീസില്‍ വമ്പന്‍ അട്ടിമറി. ലോക ഒന്നാം നമ്പര്‍ താരമായ ഓസ്ട്രേലിയയുടെ ആഷ്ലി ബാര്‍ട്ടി ആദ്യ റൗണ്ടില്‍ തന്നെ പുറത്ത്. വിംബിള്‍ഡണ്‍ ചാമ്പ്യനും ലോക ഒന്നാം നമ്പര്‍ വനിതാ താരവും ആഷ്ലി ബാര്‍ട്ടിനെ സാറ സോറിബസ് ആണ് അട്ടിമറിച്ചത്. ഒളിമ്പിക്സ് ചരിത്രത്തിലെ തന്നെ ഏറ്റവും വലിയ അട്ടിമറികളില്‍ ഒന്നിനാണ് ടെന്നീസ് ലോകം സാക്ഷ്യം വഹിച്ചത്. ലോക റാങ്കിങ്ങില്‍ 48-ാം സ്ഥാനത്തുള്ള സാറ സോറിബസ് നേരിട്ടുള്ള സെറ്റുകള്‍ക്കാണ് ആഷ്ലി ബാര്‍ട്ടിനെ തകര്‍ത്തത്. സ്‌കോര്‍: 6-4, 6-3. ഒളിമ്പിക്സില്‍ സ്വര്‍ണ പ്രതീക്ഷയുമായി എത്തിയ ബാര്‍ട്ടി പക്ഷേ കളിക്കളത്തില്‍ തീര്‍ത്തും നിരാശാജനകമായ പ്രകടനമാണ് പുറത്തെടുത്തത്. ഇതുമുതലെടുത്ത സാറ ആദ്യ സെറ്റിലും രണ്ടാം സെറ്റിലും തകര്‍പ്പന്‍ പ്രകടനമാണ് പുറത്തെടുത്തത്. ബാര്‍ട്ടിയുടെ ഭാഗത്തു നിന്ന് വന്ന നിരവധി പിഴവുകളും സാറയ്ക്ക് തുണയായി.
ബാഡ്മിന്റണില്‍ ഇന്ത്യയുടെ മെഡല്‍ പ്രതീക്ഷയായ പി.വി സിന്ധുവിന് ജയത്തോടെ തുടക്കം. ഇസ്രായേല്‍ താരം സെനി പോളികാര്‍പോവയെ നേരിട്ടുള്ള സെറ്റുകള്‍ക്കാണ് സിന്ധു തകര്‍ത്തത്. സ്‌കോര്‍: 21-7, 21-10. 2016ലെ റിയോ ഒളിമ്പിക്‌സിലെ വെള്ളി മെഡല്‍ ജേതാവ് കൂടിയാണ് പി.വി. സിന്ധു.
അതേസമയം ഒളിമ്പിക്‌സിന്റെ മൂന്നാം ദിവസത്തില്‍ ഷൂട്ടിങ്ങില്‍ വനിതകളുടെ വിഭാഗത്തില്‍ മനു ഭാക്കറും യശ്വസിനി സിങ് ദേശ്വാളും പുറത്തായി. വനിതകളുടെ 10 മീറ്റര്‍ എയര്‍ പിസ്റ്റള്‍ വിഭാഗത്തില്‍ ഇരുവര്‍ക്കും ഫൈനലില്‍ യോഗ്യത നേടാന്‍ സാധിച്ചില്ല. മത്സരത്തിനിടെ പിസ്റ്റള്‍ തകരാറിലായി സമയം നഷ്ടപ്പെട്ടത് മനു ഭാക്കറിന് തിരിച്ചടിയായി. മനു ഭാക്കര്‍ രണ്ടിനത്തില്‍ കൂടി മത്സരിക്കും.
