ടോക്യോ ഒളിമ്പിക്‌സിന് ഇന്ന് കൊടിയിറക്കം. വനിതാ വിഭാഗം വോളിബോള്‍, ബാസ്‌കറ്റ് ബോള്‍ സ്വര്‍ണ മെഡല്‍ പോരാട്ടങ്ങള്‍ ഇന്ന് നടക്കും. സൈക്കിളിംഗ്, ബോക്‌സിംഗ് ഫൈനലുകളും ഇന്ന് നടക്കും.
ഒളിമ്പിക്‌സില്‍ നിന്നും ഇത്തവണ ഇന്ത്യയുടെ മടക്കം എക്കാലത്തേയും മികച്ച പ്രകടനത്തോടെയാണ്. നീരജ് ചോപ്ര ചരിത്ര നേട്ടം കുറിച്ചതോടെ മെഡല്‍ നേട്ടം ഒരു സ്വര്‍ണവും, രണ്ട് വെള്ളിയും, നാല് വെങ്കലവും അടക്കം ഏഴ് മെഡലുകളായി ഉയര്‍ന്നു. 2012 ല്‍ ലണ്ടന്‍ ഒളിമ്പിക്‌സില്‍ ഇന്ത്യ നേടിയിരുന്നത് ആറ് മെഡലുകളായിരുന്നു. ഈ റെക്കോര്‍ഡാണ് 2021 ല്‍ ഇന്ത്യ തിരുത്തിയത്.
ഒളിമ്പിക്‌സ് മത്സരങ്ങള്‍ ആരംഭിച്ച ആദ്യ ദിനം തന്നെ വെള്ളി മെഡല്‍ സ്വന്തമാക്കി ഇന്ത്യയുടെ അഭിമാനമുയര്‍ത്തിയത് മീരാബായ് ചാനുവാണ്. ഭാരോദ്വഹനത്തിലായിരുന്നു മീരാബായ് ചാനുവിന്റെ പ്രകടനം. ഗുസ്തി മത്രസത്തില്‍ രവി കുമാര്‍ ദഹിയയും വെള്ളി സ്വന്തമാക്കി. തുടര്‍ന്നുള്ള മത്സരങ്ങളില്‍ വനിതകളുടെ ബാഡ്മിന്റണില്‍ പി.വി സിന്ധുവും, വനിതകളുടെ വെല്‍റ്റര്‍വെയ്റ്റ് ബോക്‌സിംഗില്‍ ലോവ്‌ലീനയും, ഇന്ത്യന്‍ പുരുഷ ഹോക്കി ടീമും, ഗുസ്തിയില്‍ ബജ്‌റംഗ് പൂനിയയും വെങ്കല മെഡലുകള്‍ നേടി. ഇന്ത്യന്‍ പുരുഷ ഹോക്കി ടീമിന്റെ മെഡല്‍ നേട്ടത്തില്‍ മുഖ്യപങ്ക് വഹിച്ചത് മലയാളിയായ പി.ആര്‍ ശ്രീജേഷാണ്. ഇതോടെ ആദ്യമായി കേരളത്തിലേക്കും ഒളിമ്പിക്‌സ് മെഡല്‍ എത്തുകയാണ്.
നീരജ് ചോപ്ര മാത്രമാണ് ഇന്ത്യയ്ക്കായി സ്വര്‍ണം നേടിയത്. ജാവലിന്‍ ത്രോയിലായിരുന്നു അഭിമാന നേട്ടം കൈവരിച്ചത്. 87.58 ദൂരം താണ്ടിയാണ് നീരജ് സ്വതന്ത്ര്യ ഇന്ത്യയുടെ ആദ്യ ഒളിമ്പിക്‌സ് അത്‌ലറ്റിക്‌സ് മെഡല്‍ നേടിയത്. സ്വാതന്ത്ര്യത്തിനു മുന്‍പ് ആംഗ്ലോ ഇന്ത്യക്കാരനായ നോര്‍മന്‍ പ്രിച്ചാര്‍ഡ് ആണ് ഇന്ത്യക്ക് വേണ്ടി ട്രാക്ക് ആന്‍ഡ് ഫീല്‍ഡില്‍ നിന്ന് ആദ്യ മെഡല്‍ കണ്ടെത്തിയത്. 1900 പാരിസ് ഒളിമ്പിക്‌സ് 200 മീറ്റര്‍ ഓട്ടമത്സരത്തിലെ വെള്ളിമെഡല്‍ ജേതാവായിരുന്നു പ്രിച്ചാര്‍ഡ്.
അഭിനവ് ബിന്ദ്രയ്ക്ക് ശേഷം ഇന്ത്യയുടെ ആദ്യ വ്യക്തിഗത ഒളിമ്പിക്‌സ് സ്വര്‍ണ മെഡല്‍ ജേതാവാണ് നീരജ്. രണ്ടാം ശ്രമത്തിലാണ് നീരജ് സ്വര്‍ണ മെഡല്‍ ദൂരം താണ്ടിയത്. ചെക്ക് റിപ്പബ്ലിക്ക് താരങ്ങള്‍ക്കാണ് വെള്ളി, വെങ്കല മെഡലുകള്‍. രണ്ടാമത് ജാക്കൂബ് വ്‌ലാഡ്‌ലെച്ചും (86.67 മീറ്റര്‍) മൂന്നാമത് വിറ്റസ്ലേവ് വെസ്ലിയും (85.44 മീറ്റര്‍) ഫിനിഷ് ചെയ്തു.
