മാസം തികയാതെ പ്രസവിച്ച കുട്ടികളെ ആശുപത്രിയില് എത്തിക്കാന് വൈകിയതിനാല് അമ്മയുടെ കണ്മുന്നില് നവജാത ഇരട്ടക്കുട്ടികള് മരിച്ചു. അമിതമായി രക്തം വാര്ന്ന സ്ത്രീയെ ഏകദേശം 3 കിലോമീറ്ററോളം ചുമന്നാണ് ആശുപത്രിയില് എത്തിച്ചത്. മഹാരാഷ്ട്രയിലെ പാല്ഘര് ജില്ലയിലാണ് ഹൃദയ ഭേദകമായ സംഭവം.
പാല്ഘര് ജില്ലയിലെ മൊഖദ തഹ്സിലിലെ താമസക്കാരിയായ വന്ദന ബുധര്, ഏഴാം മാസം തന്റെ വീട്ടില് ഇരട്ടക്കുട്ടികള്ക്ക് ജന്മം നല്കി. മാസം തികയാതെ ജനിച്ച ഇരട്ടക്കുട്ടികള്ക്ക് അടിയന്തിര ചികിത്സ ആവശ്യമായിരുന്നു. ശരിയായ വൈദ്യസഹായം ലഭിക്കാത്തതിനാല് രണ്ട് കുട്ടികളും അമ്മയുടെ കണ്മുന്നില് മരിച്ചു. പിന്നാലെ കനത്ത രക്തസ്രാവം മൂലം സ്ത്രീയുടെ നില വഷളായി.
ആശുപത്രിയിലേക്ക് വഴിയോ വാഹനമോ ഇല്ലാത്തതിനാല് കുടുംബാംഗങ്ങള് കയറും ബെഡ്ഷീറ്റും തടിയും ഉപയോഗിച്ച് താല്ക്കാലിക സ്ട്രെച്ചര് തയ്യാറാക്കി യുവതിയെ 3 കിലോമീറ്ററോളം ചുമന്ന് ആശുപത്രിയില് എത്തിച്ചു. ഇതിന്റെ ഞെട്ടിക്കുന്ന ചിത്രങ്ങള് പുറത്തു വന്നിട്ടുണ്ട്. നവജാത ശിശുക്കളെ നഷ്ടപ്പെട്ട അമ്മയെ രക്ഷിക്കാനുള്ള ശ്രമത്തിന്റെ ഭാഗമായി അവര് അപകടകരമായ ചരിവുകള് നടന്നിറങ്ങുന്നത് ദൃശ്യങ്ങളില് കാണാം.
അമ്മ ഇപ്പോള് ആശുപത്രിയില് ചികിത്സയിലാണ്. സംസ്ഥാനത്തിന്റെ പല ഭാഗങ്ങളിലും റോഡുകള് ഇല്ലാത്തതിനാലാണ് ഇത്തരം സംഭവങ്ങള്ക്ക് കാരണമെന്ന് മുഖ്യമന്ത്രി ഏക്നാഥ് ഷിന്ഡെയ്ക്കും ഉപമുഖ്യമന്ത്രി ദേവേന്ദ്ര ഫഡ്നാവിസിനും അയച്ച കത്തില് ബിജെപി ചൂണ്ടിക്കാട്ടി. സംഭവം ദൗര്ഭാഗ്യകരമാണെന്ന് ബിജെപി ദേശീയ സെക്രട്ടറി പങ്കജ മുണ്ടെയുംപ്രതികരിച്ചു.
രാജ്യം സ്വാതന്ത്ര്യത്തിന്റെ 75 വര്ഷം ആഘോഷിക്കുന്ന വേളയില് പാവപ്പെട്ടവര് ഇത്തരം ബുദ്ധിമുട്ടുകള് നേരിടുന്നത് ദുഃഖകരമാണെന്നും അവര് കൂട്ടിച്ചേര്ത്തു.