അമേരിക്കയിലെ ന്യൂയോര്ക്കില് വെച്ച് കുത്തേറ്റ എഴുത്തുകാരന് സല്മാന് റഷ്ദിയുടെ ആരോഗ്യനില അതീവ ഗുരുതരമായി തുടരുന്നു. ഒരു കണ്ണിന് പരുക്കുണ്ടെന്നും വെന്റിലേറ്ററില് തന്നെ തുടരുകയാണെന്നും അദ്ദേഹത്തിന്റെ സഹായി ആന്ഡ്രൂ അറിയിച്ചു. കൈകളുടെ ഞരമ്പുകള്ക്കും കരളിനും ഗുരുതരമായി പരുക്കേറ്റിട്ടുണ്ട്. ന്യൂയോര്ക്കില് വച്ച് നടന്ന ഒരു ലെക്ചറിനിടെയാണ് ആക്രമണം നടന്നത്. അദ്ദേഹത്തിന്റെ ഒരു കണ്ണിന്റെ കാഴ്ച്ചശക്തി ഷ്ടപ്പെട്ടേക്കുമെന്ന് എ.എഫ്.പി വാര്ത്താ ഏജന്സി റിപ്പോര്ട്ടു ചെയ്യുന്നു.
പല തവണ അക്രമി അദ്ദേഹത്തെ കുത്താന് ശ്രമിച്ചെങ്കിലും രണ്ട് തവണയാണ് കുത്തേറ്റത്. സംഭവ സ്ഥലത്ത് ഒരു ഡോക്ടര് ഉണ്ടായിരുന്നതു കൊണ്ടാണ് പ്രാഥമിക ശുശ്രൂഷ നല്കാന് സാധിച്ചത്. ന്യൂജേഴ്സി ഫെയര്വിയിലുള്ള 24കാരനായ ഹാദി മറ്റാറാണ് സല്മാന് റഷ്ദിയെ ആക്രമിച്ചത്. വിഷയാവതരണം തുടങ്ങി അല്പ നേരത്തിനു ശേഷം ഹാദി സ്റ്റേജിലേക്ക് പാഞ്ഞെത്തി സല്മാന് റഷ്ദിയെ ആക്രമിക്കുകയായിരുന്നു.
ആക്രമണത്തില് പരുക്കേറ്റ റഷ്ദി സ്റ്റേജില് കുഴഞ്ഞു വീണു. തൊട്ടു പിന്നാലെ അദ്ദേഹത്തെ ഹെലിക്കോപ്റ്ററില് ആശുപത്രിയിലെത്തിച്ച് അടിയന്തര ശസ്ത്രക്രിയയ്ക്ക് വിധേയനാക്കിയിരുന്നു. നിലവില് അദ്ദേഹത്തിന് സംസാരിക്കാന് കഴിയുന്നില്ലെന്നാണ് വാര്ത്താ ഏജന്സിയുടെ റിപ്പോര്ട്ടില് പറയുന്നത്.
സാതാനിക് വേഴ്സസ് എന്ന പുസ്തകത്തിന്റെ പേരില് 1980-കളില് ഇറാനില് നിന്ന് വധഭീഷണി നേരിട്ട എഴുത്തുകാരനാണ് സല്മാന് റഷ്ദി. 1988-ല് റഷ്ദിയുടെ പുസ്തകം ഇറാനില് നിരോധിച്ചു. ഇതിന് പിന്നാലെ ഇറാനിയന് നേതാവ് ആയത്തുള്ള ഖൊമൈനി സല്മാന് റഷ്ദിക്കെതിരെ ഫത്വ പുറപ്പെടുവിച്ചിരുന്നു. റഷ്ദിയെ വധിക്കുന്നവര്ക്ക് മൂന്ന് മില്യണ് ഡോളറാണ് (23,89,29,150 രൂപ) സമ്മാനമായി പ്രഖ്യാപിച്ചിരുന്നത്.
പിന്നീട് 2012-ല് ഒരു മതസ്ഥാപനം റഷ്ദിയെ വധിക്കുന്നവര്ക്കുള്ള പാരിതോഷികം 3.3 മില്യണ് ഡോളറായി ഉയര്ത്തി. ഫത്വ കാലത്തെക്കുറിച്ച് റഷ്ദി എഴുതിയ ജോസഫ് ആന്റണ് എന്ന ഓര്മക്കുറിപ്പും പിന്നീട് വളരെ ശ്രദ്ധ നേടിയിരുന്നു.