തിരുവനന്തപുരം: അബിഗേല് സാറയെ തട്ടിക്കൊണ്ടുപോയ സംഭവത്തില് മൂന്ന് പേരെ പൊലീസ് പിടികൂടി. രണ്ട് പുരുഷന്മാരും ഒരു സ്ത്രീയുമടങ്ങുന്ന സംഘത്തെ തമിഴ്നാട് പുളിയറയില് നിന്നാണ് പിടികൂടിയത്. രണ്ട് വാഹനങ്ങളും കസ്റ്റഡിയിലെടുത്തിട്ടുണ്ട്. കൊല്ലം കമ്മീഷണറുടെ നേതൃത്വത്തിലുള്ള സ്ക്വാഡ് ആണ് ഇവരെ പിടികൂടിയത്. ചാത്തന്നൂര് സ്വദേശി പത്മകുമാര്, ഭാര്യ കവിത, മകള് അനുപമ എന്നിവരെയാണ് പൊലീസ് കസ്റ്റഡിയിലെടുത്തിരിക്കുന്നത്.
സംഭവം നടന്ന് അഞ്ചാം ദിവസമാണ് പ്രതികള് പിടിയിലാകുന്നത്. തെങ്കാളി പുളിയറയില് ഹോട്ടലില് ഭക്ഷണം കഴിക്കാനെത്തിയപ്പോഴാണ് ഇവരെ പിടികൂടിയത്. ഇവരില് ഒരാള്ക്ക് തട്ടിക്കൊണ്ടുപോകലുമായി നേരിട്ട് ബന്ധമുണ്ട്. മറ്റ് മൂന്ന് പേര് സഹായികളാണെന്നാണ് ലഭിക്കുന്ന വിവരം. കുട്ടിയുടെ പിതാവുമായുള്ള സാമ്പത്തിക ഇടപാടുകളാണ് കൃത്യത്തിന് പിന്നിലെന്നാണ് സൂചന. കൂടുതല് വിവരങ്ങള് ലഭ്യമാകുന്നതേയുള്ളു. പ്രതികളുമായി പൊലീസ് കേരളത്തിലേക്ക് തിരിച്ചു.
കുട്ടിയെ തട്ടിക്കൊണ്ടുപോയ ദിവസം പ്രതികള് സഞ്ചരിച്ചതെന്ന് സംശയിക്കുന്ന ഓട്ടോറിക്ഷയുടെ ഡ്രൈവറെ പൊലീസ് കസ്റ്റഡിയില് എടുത്തിരുന്നു. നേരത്തെ ഓട്ടോ പൊലീസ് കസ്റ്റഡിയിലെടുത്തിരുന്നു. ഈ ഓട്ടോ ഡ്രൈവര് നല്കിയ വിവരങ്ങള് അന്വേഷണത്തില് നിര്ണായകമായത്. കസ്റ്റഡിയിലായവരില് ഒരാള് ചാത്തന്നൂര് സ്വദേശി ഗോപകുമാര് ആണെന്ന് സൂചനയുണ്ട്. എന്നാല്, ഇങ്ങനെയൊരാളെ അറിയില്ലെന്ന് കുട്ടിയുടെ പിതാവ് റെജി പ്രതികരിച്ചു.