മുംബൈയില്‍ കനത്ത മഴയില്‍ 21 മരണം. ചെമ്പൂരിലുണ്ടായ മണ്ണിടിച്ചിലില്‍ 11 പേര്‍ മരിച്ചു. വാഷി നാക്കയില്‍ മതില്‍ ഇടിഞ്ഞു വീണ് 7 പേര്‍ മരിച്ചു രണ്ടുപേര്‍ക്ക് പരുക്കേറ്റു. വിക്രോളിയില്‍ വീടിനു മുകളിലെയ്ക്ക് മണ്ണിടിഞ്ഞു വീണാണ് മൂന്നു പേര്‍ മരിച്ചത്. അപകടത്തില്‍ ഗുരുതരമായി പരുക്കേറ്റ രണ്ടുപേരെ സ്വകാര്യ ആശുപത്രിയില്‍ പ്രവേശിപ്പിച്ചു.
രാത്രി മുതല്‍ തുടങ്ങിയ മഴയില്‍ നഗത്തിലെ മിക്കഭാഗങ്ങളും വെള്ളത്തിനടയിലായി. ഇന്നും ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ പ്രവചനം. ഒറ്റപ്പെട്ട കനത്ത മഴയുണ്ടാകുമെന്നും മുന്നറിയിപ്പുണ്ട്. ദക്ഷിണ മുംബൈ മേഖലയിലാണ് മഴ ശക്തമായി തുടരുന്നത്. ട്രാക്കില്‍ വെളളം കയറിയതോടെ മിക്കയിടത്തും സബര്‍ബന്‍ ട്രെയിന്‍ ഗതാഗതം താറുമാറായി.
സയണ്‍ മാട്ടുംഗ അടക്കമുള്ള പ്രദേശങ്ങളില്‍ വെള്ളക്കെട്ട് രൂക്ഷമാണ്. താഴ്ന്ന പ്രദേശങ്ങളിലെ വീടുകളില്‍ വെള്ളം കയറി. ഇവിടങ്ങളില്‍ നിന്ന് ജനങ്ങളെ സുരക്ഷിത സ്ഥാനങ്ങളിലെയ്ക്ക് മാറ്റി. കനത്ത മഴയുണ്ടാകുമെന്ന കാലാവസ്ഥ പ്രവചനത്തിന്റെ അടിസ്ഥാനത്തില്‍ കൊങ്കണ്‍, പുണെ മേഖലകളിലും ജാഗ്രത നിര്‍ദേശം പുറപ്പെടുവിച്ചിട്ടുണ്ട്.
