മലപ്പുറം: ഇരുപത് യുവതീയുവാക്കള്‍ക്ക് മംഗല്യമൊരുക്കി പട്ടിക്കാട് ജാമിഅ നൂരിയ്യ അറബിയ്യ പൂര്‍വ വിദ്യാര്‍ഥി സംഘനയായ ഓസ്‌ഫോജന-റിയാദ് കമ്മിറ്റി. വേങ്ങൂര്‍ എം.ഇ.എ. എന്‍ജിനീയറിങ് കോളേജില്‍ നടന്ന ‘വിദാദ് 2023’ സമൂഹവിവാഹമാണ് തിരഞ്ഞെടുക്കപ്പെട്ട 20 യുവതീയുവാക്കള്‍ക്ക് മാംഗല്യമൊരുക്കിയത്. പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനംചെയ്തു. മലപ്പുറം ജില്ലയ്ക്കുപുറമെ പാലക്കാട്, വയനാട്, എറണാകുളം, നീലഗിരി ജില്ലകളില്‍നിന്നുള്ളവരും ഇതിലുണ്ട്.
വിവാഹത്തില്‍ പങ്കെടുത്ത 20 പെണ്‍കുട്ടികള്‍ക്കും 10 പവന്‍വീതം സ്വര്‍ണാഭരണവും വിവാഹവസ്ത്രവും നല്‍കിയപ്പോള്‍ വരന് മഹറായി ഒരുപവന്‍ സ്വര്‍ണവും വിവാഹവസ്ത്രങ്ങളുമാണ് നല്‍കിയത്. രണ്ടായിരംപേര്‍ക്ക് ബിരിയാണിയും ഇരുനൂറുപേര്‍ക്ക് വിഭവസമൃദ്ധമായ സദ്യയും ഒരുക്കിയിരുന്നു. അത്രതന്നെയാളുകള്‍ ചടങ്ങില്‍ പങ്കെടുക്കുകയുംചെയ്തു.
സമസ്ത കേരള ജംഇയ്യത്തുല്‍ ഉലമ പ്രസിഡന്റ് ജിഫ്രി മുത്തുക്കോയ തങ്ങള്‍ അധ്യക്ഷതവഹിച്ചു. ജനറല്‍ സെക്രട്ടറി കെ. ആലിക്കുട്ടി മുസ്ലിയാര്‍, ഏലംകുളം ബാപ്പുമുസ്ലിയാര്‍, പി. അബ്ദുള്‍ ഹമീദ് എം.എല്‍.എ., അഡ്വ. നാലകത്ത് സൂപ്പി, ഷാജി അരിപ്ര, വി. ശശികുമാര്‍, അബ്ദുസമദ് പൂക്കോട്ടൂര്‍, ആനമങ്ങാട് മുഹമ്മദ് കുട്ടി ഫൈസി, ബഷീര്‍ ഫൈസി ചെരക്കാപ്പറമ്പ്, സുലൈമാന്‍ ഫൈസി എന്നിവര്‍ പ്രസംഗിച്ചു.
ജിഫ്രി മുത്തുക്കോയ തങ്ങള്‍, പാണക്കാട് സാദിഖലി ശിഹാബ് തങ്ങള്‍, കെ. ആലിക്കുട്ടിമുസ്ലിയാര്‍, പി.പി. ഉമ്മര്‍ മുസ്ലിയാര്‍ കൊയ്യോട്, സയ്യിദ് ഹമീദലി ശിഹാബ് തങ്ങള്‍, കോഴിക്കോട് ഖാസിമാരായ മുഹമ്മദ് കോയ ജമലുല്ലൈലി തങ്ങള്‍, നാസര്‍ ഹയ്യ് ശിഹാബ് തങ്ങള്‍, വാക്കോട് മൊയ്തീന്‍കുട്ടി ഫൈസി തുടങ്ങിയവര്‍ നിക്കാഹിന് കാര്‍മികത്വംവഹിച്ചു. ഹൈന്ദവാചാര ചടങ്ങുകള്‍ക്ക്് മണികണ്ഠശര്‍മ പൂജാരി നേതൃത്വംനല്‍കി. സഫ മക്ക റിയാദ്, ശിഫ അല്‍-ജസീറ യു.എ.ഇ. എന്നീ സ്ഥാപനങ്ങളാണ് ആവശ്യമായ സാമ്പത്തികസഹായം നല്‍കിയത്.
