കോട്ടയം മെഡിക്കല്‍ കോളജ് ആശുപത്രിയില്‍ നിന്ന് വീണ്ടും കുട്ടിയെ തട്ടിക്കൊണ്ട് പോകാന്‍ ശ്രമം. പുരുഷന്‍മാര്‍ക്കും സന്ദര്‍ശകര്‍ക്കും പ്രവേശനമില്ലാത്ത സ്ത്രീകളുടെ വാര്‍ഡില്‍ കയറിയാണ് അജ്ഞാതന്‍ ഒന്നര വയസുകാരനുമായി കടന്നു കളയാന്‍ ശ്രമം നടത്തിയത്. ഇത് കണ്ട കുട്ടിയുടെ അമ്മ പിറകെ ഓടി കുട്ടിയെ രക്ഷിക്കുകയായിരുന്നു.
ആലപ്പുഴ സ്വദേശിനിയുടെ കുട്ടിയെ ആണ് അജ്ഞാതന്‍ എടുത്തുകൊണ്ട് പോയത്. കുട്ടിയുമായി ഒരാള്‍ പോകുന്നത് കണ്ട അമ്മ പുറകെ ചെന്ന് കുട്ടിയെ രക്ഷിച്ചു. പിന്നീട് ഇയാളെ കാണാതായി.
പുരുഷന്‍മാര്‍ക്കും സന്ദര്‍ശകര്‍ക്കും പ്രവേശനമില്ലാത്ത സ്ത്രീകളുടെ ഒബ്‌സേര്‍വേഷന്‍ വാര്‍ഡില്‍ കഴിഞ്ഞദിവസം വൈകിട്ടാണ് സംഭവം നടന്നത്. മുഴുവന്‍ സമയവും സുരക്ഷാ ജീവനക്കാരുള്ള ഇവിടെയാണ് അജ്ഞാതന്‍ സുഗമമായി കടന്നു ചെന്ന് ഒന്നര വയസുകാരനെ തട്ടിക്കൊണ്ടു പോകാന്‍ ശ്രമം നടത്തിയത്.
അതേസമയം മെഡിക്കല്‍ കോളജില്‍ നടക്കുന്നത് ദുരൂഹമായ കാര്യങ്ങളാണെന്ന് തിരൂവഞ്ചൂര്‍ രാധാകൃഷ്ണന്‍ എംഎല്‍എ പറഞ്ഞു. സംഭവത്തില്‍ സര്‍ക്കാര്‍ ഇടപെടണം. സുരക്ഷ ജീവനക്കാരുണ്ടായിട്ടും അജ്ഞാതര്‍ വാര്‍ഡിനകത്തേക്ക് കടന്നത് ഗൗരവമായി കാണണമെന്നും തിരുവഞ്ചൂൂര്‍ വ്യക്തമാക്കി.
