യുഎസില് അതിവേഗം പടര്ന്നു പിടിച്ച ഒമൈക്രോണിന്റെ ഉപവകഭേദം യുകെയില് കണ്ടെത്തിയതായി റിപ്പോര്ട്ടുകള്. ഒമൈക്രോണിന്റെ ഉപവകഭേദമായ BA.4.6 ആണ് കണ്ടെത്തിയിരിക്കുന്നത്. ഓഗസ്റ്റ് 14 മുതലുള്ള കോവിഡ് പരിശോധനാ ഫലങ്ങളില് 3.3% ശതമാനം സാമ്പിളുകളിലും കണ്ടെത്തിയത് BA.4.6 വകഭേദം ആയിരുന്നുവെന്ന് യുകെ ഹെല്ത്ത് സെക്യൂരിറ്റി ഏജന്സിയുടെ (യുകെഎച്ച്എസ്എ) കോവിഡ് വേരിയന്റുകളെക്കുറിച്ചുള്ള ഏറ്റവും പുതിയ ബ്രീഫിംഗ് ഡോക്യുമെന്റ് വ്യക്തമാക്കുന്നു.
ഇതിനുശേഷം BA.4.6 കേസുകളുടെ എണ്ണം ക്രമാതീതമായി വര്ധിച്ചുവെന്നും ഡോക്യുമെന്റില് സൂചിപ്പിക്കുന്നു. ലോകമെമ്പാടുമുള്ള മറ്റ് പല രാജ്യങ്ങളിലും ഈ വകഭേദം കണ്ടെത്തിയതായി റിപ്പോര്ട്ടുകളുണ്ട്.
BA.4.6ന്റെ ഉറവിടം എവിടെയെന്ന് കണ്ടെത്താനായിട്ടില്ല. പക്ഷേ ഇതൊരു പുനഃസംയോജന വകഭേദമാകാനാണ് സാധ്യതയെന്നാണ് ആരോഗ്യ വിദഗ്ധരുടെ അഭിപ്രായം (രണ്ട് വ്യത്യസ്ത വകഭേദങ്ങള് ഒരേ സമയം ഒരേ വ്യക്തിയെ ബാധിക്കുമ്പോഴാണ് പുനഃസംയോജനം സംഭവിക്കുന്നത്).
അതേസമയം, ആഅ.4.6 വകഭേദം കൂടുതല് ഗുരുതരമായ ആരോഗ്യ പ്രശ്നങ്ങള് ഉണ്ടാക്കുന്നില്ലെങ്കിലും ഇതിന്റെ വ്യാപന ശേഷി മറ്റ് വകഭേദങ്ങളേക്കാള് കൂടുതലാണെന്നാണ് റിപ്പോര്ട്ടുകള് വ്യക്തമാക്കുന്നത്. കോവിഡ് വാക്സിന് ഡോസുകള് കൃത്യമായി സ്വീകരിച്ചവര് ബൂസ്റ്റര് ഡോസ് കൂടി സ്വീകരിക്കുന്നതാണ് അഭികാമ്യം.
കോവിഡിന്റെ പുതിയ വകഭേദങ്ങള് വ്യാപിക്കുന്ന പശ്ചാത്തലത്തില് വിവിധ രാജ്യങ്ങള് വീണ്ടും കോവിഡ് പ്രതിരോധ മാനദണ്ഡങ്ങള് കര്ശനമാക്കിയിട്ടുണ്ട്.