കേരള ബാങ്കിന്റെ ‘വിദ്യാനിധി’ പദ്ധതി 29നു മുഖ്യമന്ത്രി ഉദ്ഘാടനം ചെയ്യും കുട്ടികള്ക്കായി കേരള ബാങ്ക് ആവിഷ്കരിച്ച ‘വിദ്യാനിധി’ നിക്ഷേപ പദ്ധതിയുടെ സംസ്ഥാനതല ഉദ്ഘാടനം 29നു മുഖ്യമന്ത്രി പിണറായി വിജയന് നിര്വഹിക്കും. കുട്ടികളില് സമ്പാദ്യശീലം വളര്ത്തുക, പഠനാവശ്യങ്ങള്ക്ക് ആ തുക ഉപയോഗിക്കാന് പ്രാപ്തരാക്കുക എന്നീ ലക്ഷ്യങ്ങളോടെ ഏഴു മുതല് 12 വരെ ക്ലാസുകളിലെ കുട്ടികള്ക്കായാണു ‘വിദ്യാനിധി’ പദ്ധതി ആരംഭിക്കുന്നത്.
പദ്ധതി പ്രകാരം 12 മുതല് 16 വരെ പ്രായമുള്ള കുട്ടികള്ക്കു സ്വന്തം പേരില് സേവിംഗ്സ് ബാങ്ക് അക്കൗണ്ട് തുറക്കാം. സൗജന്യ എസ്.എം.എസ്, സൗജന്യ ഡി.ഡി. ചാര്ജ്, സൗജന്യ ആര്ടിജിഎസ്, എന്ഇഎഫ്ടി, ഐഎംപിഎസ് സേവനങ്ങള്, വിദ്യാഭ്യാസ വായ്പയ്ക്കു മുന്ഗണന, സൗജന്യ സര്വീസ് ചാര്ജ്, സൗജന്യ എ.ടി.എം. കാര്ഡ്, മൊബൈല് ബാങ്കിങ് സൗകര്യം തുടങ്ങിയവ ഈ അക്കൗണ്ടിന്റെ പ്രത്യേകതകളാണ്. കേന്ദ്ര സംസ്ഥാന സര്ക്കാരുകളുടെ വിവിധ സ്കോളര്ഷിപ്പുകള് ഈ അക്കൗണ്ട് വഴി ലഭിക്കും.
പദ്ധതിയില് അംഗമായ കുട്ടികളുടെ സുരക്ഷ ഉറപ്പാക്കാനായി രക്ഷകര്ത്താവിന് (മാതാവിനു മുന്ഗണന) എല്ലാവിധ സാധാരണ ഇടപാടുകളും നടത്താന് കഴിയുന്ന സ്പെഷ്യല് പ്രിവിലേജ് അക്കൗണ്ട് തുറക്കുന്നതിനും അനുവാദം നല്കും. രണ്ടു ലക്ഷം രൂപവരെയുള്ള അപകട ഇന്ഷ്വറന്സ് പരിരക്ഷ ഈ അക്കൗണ്ട് ഉറപ്പാക്കും. ആദ്യ വര്ഷ പ്രീമിയം ബാങ്ക് നല്കും.
29നു രാവിലെ 11നു തിരുവനന്തപുരം മാസ്കറ്റ് ഹോട്ടലിലെ ഹാര്മണി ഹാളില് നടക്കുന്ന ചടങ്ങില് സഹകരണ – രജിസ്ട്രേഷന് വകുപ്പ് മന്ത്രി വി.എന്. വാസവന് അധ്യക്ഷത വഹിക്കും. വിദ്യാഭ്യാസ മന്ത്രി വി. ശിവന്കുട്ടി മുഖ്യ പ്രഭാഷണം നടത്തും. കേരള ബാങ്ക് പ്രസിഡന്റ് ഗോപി കോട്ടമുറിക്കല്, പൊതുവിദ്യാഭ്യാസ സെക്രട്ടറി എ.പി.എം. മുഹമ്മദ് ഹനീഷ്, സഹകരണ വകുപ്പ് സെക്രട്ടറി മിനി ആന്റണി തുടങ്ങിയവര് പങ്കെടുക്കും.