പട്ന: ബിഹാറില് വ്യാജമദ്യദുരന്തത്തിൽ പതിനാറുപേര് മരിച്ചു. പടിഞ്ഞാറന് ചമ്പാരനില് ബുധനാഴ്ചയാണ് ദുരന്തമുണ്ടായത്. വ്യാജമദ്യ ദുരന്തമുണ്ടായെന്ന വിവരത്തെ തുടര്ന്ന് പ്രാദേശിക മാധ്യമപ്രവര്ത്തകര് നടത്തിയ അന്വേഷണമാണ് വാര്ത്ത പുറത്തെത്തിച്ചത്. അതിനകം തന്നെ ദുരന്തത്തില് മരിച്ചവരുടെ മൃതദേഹങ്ങള് ഗ്രാമവാസികള് സംസ്കരിച്ചിരുന്നു.
ബീഹാറിലെ ലോരിയ പോലീസ് സ്റ്റേഷന് പരിധിക്കു കീഴിലുള്ള ദിയോര്വ ദിയരാജ് ഗ്രാമത്തിലാണ് സംഭവം നടന്നത്. വ്യാജമദ്യം കഴിച്ചതിനെ തുടര്ന്ന് നിരവധിപേര് മരിച്ചതായി വിവരം ലഭിച്ചുവെന്ന് ചമ്പാരന് റേഞ്ച് ഡി.ഐ.ജി. ലല്ലന് മോഹന് പ്രസാദ് പ്രതികരിച്ചു. ഇക്കാര്യം അന്വേഷിച്ച് വരുകയാണെന്നും അദ്ദേഹം കൂട്ടിച്ചേര്ത്തു. അതേസമയം മരണസംഖ്യ ഇനിയും കൂടാൻ സാധ്യതയുണ്ടെന്നാണ് റിപോർട്ടുകൾ.
