മുംബൈ ലഹരികേസിലെ കോഴ ആരോപണത്തില് എന്.സി.ബി സോണല് ഡയറക്ടര് സമീര് വാങ്കഡെയെ വിജിലന്സ് ഇന്ന് ചോദ്യം ചെയ്യും. ആര്യന് ഖാന് ഉള്പ്പെട്ട ലഹരിക്കേസ് ഒത്തുതീര്പ്പാക്കാന് പണം ആവശ്യപ്പെട്ടെന്നായിരുന്നു വാങ്കഡെയ്ക്കെതിരായ ആരോപണം. അതേസമയം ആര്യന്റെ ജാമ്യാപേക്ഷയില് ബോംബെ ഹൈക്കോടതിയില് ഇന്നും വാദം തുടരും.
ആര്യന് ഖാനൊപ്പം ക്രൂയിസ് കപ്പലില് നിന്നും സെല്ഫിയെടുത്ത കിരണ് ഗോസാവി ഷാറൂഖ് ഖാനോട് 25 കോടി രൂപ ആവശ്യപ്പെട്ടുവെന്നായിരുന്നു കേസിലെ സാക്ഷിയായ പ്രഭാകര് സെയിലിന്റെ ആരോപണം. ഇതില് 18 കോടി എന്.സി.ബി സോണല് ഡയറക്ടറായ സമീര് വാങ്കഡെക്ക് നല്കാമെന്ന് ഗോസാവി പറഞ്ഞത് കേട്ടെന്നും പ്രഭാകര് സെയില് കോടതിയില് സമര്പ്പിച്ച സത്യവാങ്മൂലത്തില് പറഞ്ഞിരുന്നു.
വാങ്കഡെയ്ക്കെതിരെ കൂടുതല് ആരോപണങ്ങളുമായി മഹാരാഷ്ട്ര മന്ത്രി നവാബ് മാലിക്കും രംഗത്തെത്തിയിരുന്നു. ലഹരിക്കേസില് ബോളിവുഡ് താരങ്ങളില് നിന്ന് വാങ്കഡെ പണം തട്ടിയെന്നായിരുന്നു ആരോപണം. പേര് വെളിപ്പെടുത്താതെ ഒരു എന്.സി.ബി ഉദ്യോഗസ്ഥന് അയച്ച കത്തും നവാബ് മാലിക് പുറത്തുവിട്ടിരുന്നു. ദീപിക പദുകോണ് അടക്കമുള്ള ബോളിവുഡ് താരങ്ങളെ വാങ്കഡെ ഭീഷണിപ്പെടുത്തിയെന്നും കത്തില് സൂചിപ്പിക്കുന്നുണ്ട്. ഇതിന്റെ അടിസ്ഥാനത്തില് വിശദമായ അന്വേഷണം ആവശ്യപ്പെട്ട് എന്.സി.ബി. ഡയറക്ര് ജനറലിന് മന്ത്രി പരാതി അയക്കുകയും ചെയ്തിരുന്നു. അതിനിടെ എന്.സി.ബി ആസ്ഥാനത്തെത്തി, ഡയറക്റ്റര് ജനറലിനെ വാങ്കഡെ സന്ദര്ശിച്ചിരുന്നു.
നിയമ നടപടികളെ തകിടം മറിക്കാനും തന്നെ കുടുക്കാനുമാണ് നീക്കം നടക്കുന്നതെന്നാരോപിച്ച് സമീര് വാങ്കഡെ മുംബൈ പൊലീസ് മേധാവിക്ക് കത്തയച്ചു. ഏജന്സിയെ അപകീര്ത്തിപ്പെടുത്താനാണ് പ്രഭാകറിന്റെ മൊഴിയെന്നും ഉദ്യോഗസ്ഥര് പറഞ്ഞു.