തലശേരി ഇരട്ടക്കൊലപാതകത്തിന് പ്രതികള് ഉപയോഗിച്ച ആയുധം പൊലീസ് കണ്ടെടുത്തു. കൃത്യം നടന്ന സ്ഥലത്തും, ആയുധവും വാഹനവും ഒളിപ്പിച്ച സ്ഥലത്തും പ്രതികളെയെത്തിച്ച് തെളിവെടുത്തു. അതേസമയം കേസിലെ പ്രധാന പ്രതി ബാബു പാറായി മുന് മുഖ്യമന്ത്രി ഉമ്മന്ചാണ്ടിയെ കല്ലെറിഞ്ഞ കേസിലെ പ്രതിയാണെന്ന് കണ്ണൂര് ഡിസിസി പ്രസിഡന്റ് മാര്ട്ടിന് ജോര്ജ് ആരോപിച്ചു.
കൊലപാതത്തിനായി പോയ ഓട്ടോയും കണ്ടെത്തി.മൂന്നാം പ്രതി സന്ദീപിന്റെ വീടിനടുത്താണ് ഓട്ടോ നിര്ത്തിയിട്ടിരുന്നത്. ആയുധം ഒളിപ്പിച്ച് ശേഷം കര്ണാടകയിലേക്ക് കടക്കാനായിരുന്നു ശ്രമമെന്നുംകൊലപാതകം ആസൂത്രിതമായിരുന്നുവെന്നും പൊലീസ് പറഞ്ഞു.
കേസിലെ മുഴുവന് പ്രതികളെയും പൊലീസ് പിടികൂടിയിട്ടുണ്ട്. തലശ്ശേരി സ്വദേശികളായ പാറായി ബാബു, ജാക്ക്സണ്, ഫര്ഹാന്, നവീന് എന്നിവരാണ് പൊലീസിന്റെ പിടിയിലായത്. കേസിലെ പ്രധാന പ്രതിയായ പാറായി ബാബു ഒളിവില് കഴിയുകയായിരുന്നു. കര്ണാടകയിലേക്ക് കടക്കാന് ശ്രമിക്കുന്നതിനിടെ ബാബു സഞ്ചരിച്ച കാര് വളഞ്ഞിട്ട് സാഹസികമായാണ് പൊലീസ് ഇയാളെ കീഴ്പെടുത്തിയത്. ബാബുവിനെ ഒളിവില് കഴിയാന് സഹായിച്ച രണ്ട് പേരെക്കൂടി പിടികൂടി.
അതേസമയം കേസില് രാഷ്ട്രീയ ആരോപണം സജീവമാക്കി കോണ്ഗ്രസ്. രണ്ട് സിപിഐഎം പ്രവര്ത്തകരുടെ ജീവനെടുത്ത കേസിലെ മുഴുവന് പ്രതികളും സിപിഐഎം അനുഭാവികള് തന്നെയെന്ന് ആരോപണം. പ്രധാന പ്രതി ബാബു പാറായി മുന് മുഖ്യമന്ത്രി ഉമ്മന്ചാണ്ടിയെ കണ്ണൂരില് കല്ലെറിഞ്ഞ കേസിലെ പ്രതിയെന്നും ഡിസിസി അധ്യക്ഷന് മാര്ട്ടിന് ജോര്ജ്.
ലഹരി മാഫിയയെ ചോദ്യം ചെയ്തതിന്റെ വൈരാഗ്യമാണ് കൊലയ്ക്ക് പിന്നിലെന്നാണ് സിപിഐഎം വാദം. എന്നാല് സാമ്പത്തിക ഇടപാടുകളെ ചൊല്ലിയുള്ള തര്ക്കവും, ഗ്യാങ്ങ് വാറും കൊലയ്ക്ക് പ്രധാന പ്രകോപനമെന്നാണ് പൊലീസ് നിഗമനം.