സേഫ് ആന്ഡ് സ്ട്രോങ് നിക്ഷേപ തട്ടിപ്പ് കേസിലെ മുഖ്യപ്രതി പ്രവീണ് റാണ പിടികൂടിയത് സാഹസികമായി. സിനിമയെ വെല്ലുന്ന സാഹസിക രംഗങ്ങള്ക്കൊടിവിലാണ് പൊലീസ് റാണയെ കീഴ്പ്പെടുത്തിയത്. കോയമ്പത്തൂരിനും പൊള്ളാച്ചിക്കും ഇടയിലെ ദേവരായപുരത്തായിരുന്നു പ്രവീണ് റാണയുടെ താമസം. ഏറുമാടം കെട്ടി അംഗരക്ഷകര്ക്കൊപ്പം സ്വാമി വേഷത്തില് കഴിയുകയായിരുന്നു. പൊലീസ് എത്തിയപ്പോള് പട്ടികളെ അഴിച്ചുവിട്ടു. തുടര്ന്ന് പൊലീസ് ഇയാളെ അതി സാഹസികമായി പിടികൂടുകയായിരുന്നു. മൂന്ന് അംഗരക്ഷകരേയും പൊലീസ് കസ്റ്റഡിയിലെടുത്തു.
ഇതര സംസ്ഥാനത്തും പൊലീസ് അന്വേഷണം തുടരുന്നതിനിടയിലാണ് പ്രവീണ് ഇന്ന് വൈകുന്നേരത്തോടെ ദേവരായപുരത്തു നിന്ന് കസ്റ്റഡിയിലാകുന്നത്. കഴിഞ്ഞ ആറിനാണ് ഇയാള് സംസ്ഥാനം വിട്ടത്.
കഴിഞ്ഞ ദിവസം പൊലീസ് റാണയെ പിടികൂടുന്നതിനായി ചെലവന്നൂര് കായലോരത്തെ ഫ്ലാറ്റിലെത്തിയെങ്കിലും സാഹസികമായി രക്ഷപെട്ടിരുന്നു. തൃശൂര് പൊലീസെത്തുമ്പോള് റാണ ഫ്ലാറ്റിലുണ്ടായിരുന്നു. പരിശോധനകള്ക്കായി പൊലീസ് മുകളിലേക്ക് കയറിയപ്പോഴാണ് റാണ മറ്റൊരു ലിഫ്റ്റില് രക്ഷപ്പെട്ടത്. പൊലീസ് എത്തുന്നതിന് മുമ്പ് ഇയാള് ബി.എം.ഡബ്ല്യൂ കാറില് രക്ഷപ്പെടുകയായിരുന്നു. ഇതറിഞ്ഞ പൊലീസ് ചാലക്കുടിയില് വാഹനം തടഞ്ഞപ്പോള് റാണ അതില് ഇല്ലായിരുന്നു.
ഫ്ലാറ്റില്നിന്ന് ഇയാള് പോകുന്ന സി.സി.ടി.വി ദൃശ്യങ്ങള് പൊലീസിന് ലഭിച്ചിട്ടുണ്ട്. കലൂരില് വെച്ച് ഇയാള് മറ്റൊരു വാഹനത്തില് ഇതര സംസ്ഥാനത്തേയ്ക്ക് മുങ്ങുകയായിരുന്നു. ഇതിന് പിന്നാലെ സംസ്ഥാനത്തിന് പുറത്തേക്കും അന്വേഷണം ആരംഭിക്കുകയായിരുന്നു.
തൃശൂരിലെ സേഫ് ആന്റ് സ്ട്രോങ്ങ് മാര്ക്കറ്റിംഗ് കണ്സള്ട്ടന്സിയിലൂടെയാണ് പ്രവീണ് റാണ തട്ടിപ്പ് നടത്തിയത്. നിക്ഷേപകരോട് 48% വരെ റിട്ടേണ് ലഭിക്കുമെന്ന് പറഞ്ഞ് പണം നിക്ഷേപിക്കാന് പ്രേരിപ്പിച്ചു. ഇത്തരത്തില് നൂറ് കോടി രൂപയുടെ തട്ടിപ്പാണ് പ്രവീണ് റാണ നടത്തിയിരിക്കുന്നത്. വാര്ത്ത പുറത്ത് വന്നതോടെ കൂടുതല് പരാതികള് വരുന്നുണ്ട്. ഇതോടെ തട്ടിയ പണത്തിന്റെ മൂല്യം 150 കോടി കടക്കുമെന്നാണ് റിപ്പോര്ട്ട്.
കോടിക്കണക്കിന് രൂപ തട്ടിയെടുത്ത പ്രവീണ് റാണയുടെ അക്കൗണ്ടില് ഇപ്പോള് പത്ത് പൈസയില്ലെന്ന് വിവരം. പൊലീസ് നടത്തിയ ചോദ്യം ചെയ്യല്ലില് ആണ് ഇക്കാര്യം പ്രവീണ് റാണ പറഞ്ഞതെന്നാണ് സൂചന. പൊലീസ് അന്വേഷണം ആരംഭിച്ചതോടെ വിരലില് അണിഞ്ഞ വിവാഹമോതിരം വിറ്റാണ് റാണ ഒളിവില് പോകാനുള്ള പണം സ്വരൂപിച്ചത്.
പണത്തിനായി പല സുഹൃത്തുകളേയും സമീപിച്ചെങ്കിലും അവരെല്ലാം കൈമലര്ത്തിയെന്നാണ് റാണ പൊലീസിനോട് പറഞ്ഞത്. ഒടുവില് കോയമ്പത്തൂരെത്തി വിവാഹ മോതിരം വിറ്റ് പണം കണ്ടെത്തി. പൊള്ളാച്ചിയിലെത്തുമ്പോള് കയ്യിലുണ്ടായിരുന്നത് 75,000 രൂപയാണെന്നും റാണ പറയുന്നു. സുഹൃത്ത് ഷൗക്കത്തിന് 16 കോടി കടം കൊടുത്തതായി റാണ പൊലീസിന് മൊഴി നല്കിയിട്ടുണ്ട്. ഇയാളെ ഒളിവില് പോകാന് സഹായിച്ച രണ്ട് അംഗരക്ഷകരെ കസ്റ്റഡിയിലെടുത്തു.
കൊച്ചിയിലെ ഫ്ളാറ്റില് പൊലീസ് എത്തിയതിന് പിന്നാലെ അവിടെ നിന്നും രക്ഷപ്പെട്ട റാണയെ സുഹൃത്തുക്കള് കെഎസ്ആര്ടിസി ബസ് സ്റ്റാന്ഡില് ഇറക്കി. അവിടെ നിന്നും ബസില് ഇയാള് അങ്കമാലി എത്തി. അങ്കമാലിയില് നിന്നും ബന്ധുവായ പ്രജിത്തിന്റെ കാറിലാണ് പൊള്ളാച്ചിയിലേക്ക് പോയത്. ജനുവരി ഏഴിനെ പുലര്ച്ചെയാണ് ഇയാള് കൊച്ചിയില് നിന്നും പൊള്ളാച്ചിയിലേക്ക് കടന്നത്. പൊള്ളാച്ചിയില് റാണ ഒളിവില് കഴിഞ്ഞ ക്വാറിയുടെ ദൃശ്യങ്ങളും ഇതിനോടകം പുറത്തു വന്നിട്ടുണ്ട്.