പിരിച്ചു വിടല് നടപടി നേരിടുന്ന ഇന്സ്പെക്ടര് പി.ആര് സുനു ഡിജിപിക്ക് മുന്നില് ഹാജരായില്ല. നടപടികളുടെ ഭാഗമായി ഇന്ന് നേരിട്ട് തനിക്ക് മുന്നില് ഹാജരാവാണമെന്ന് കാണിച്ച് സംസ്ഥാന പൊലീസ് മേധാവി പി.ആര് സുനുവിന് നേരത്തെ നോട്ടീസ് നല്കിയിരുന്നു. എന്നാല് താന് ആരോഗ്യപ്രശ്നങ്ങളാല് ചികിത്സയിലാണെന്നും നേരിട്ട് ഹാജരാവാന് സമയം അനുവദിക്കണമെന്നും കാണിച്ച് സുനു ഡിജിപിക്ക് മെയില് അയച്ചിട്ടുണ്ട്. എന്നാല് ഈ മെയില് മുഖവിലയ്ക്ക് എടുക്കാതെ സുനുവിനെതിരെ നടപടികളുമായി മുന്നോട്ട് പോകാനാണ് ഡിജിപിയുടെ നീക്കം എന്നറിയുന്നു.
ഇന്ന് രാവിലെ 11ന് പൊലീസ് മേധാവിയുടെ ചേംബറിലെത്തി സര്വീസില് നിന്ന് പിരിച്ചു വിടാതിരിക്കാനുള്ള കാരണം ബോധിപ്പിക്കാനാണ് നിര്ദേശം നല്കിയത്. നേരത്തെ നോട്ടീസ് നല്കിയിരുന്നുവെങ്കിലും സുനു അഡ്മിനിസ്ട്രേറ്റീവ് ട്രിബ്യൂണലിനെ സമീപിച്ചിരുന്നു. ഇതിനെ തുടര്ന്ന് ഒരാഴ്ച്ചയ്ക്കുള്ളില് വിശദീകരണം നല്കാനായിരുന്നു ട്രിബ്യൂണലിന്റെ നിര്ദേശം. തുടര്ന്ന് ഡിസംബര് 31ന് സുനു പൊലീസ് മേധാവിക്ക് മുന്നില് ഇ മെയില് വഴി വിശദീകരണം നല്കിയിരുന്നു.
ബലാത്സംഗം അടക്കം ഒന്പത് ക്രിമിനല് കേസുകളില് പ്രതിയായ ഇന്സ്പെക്ടര് പി.ആര് സുനുവിനോട് ഇന്ന് രാവിലെ പതിനൊന്ന് മണിക്ക് ഡിജി പിക്ക് മുന്നില് നേരിട്ട് ഹാജരാകാണമെന്നാണ് നിര്ദേശിച്ചത്. പിരിച്ചുവിടല് നടപടിയുടെ ഭാഗമായിട്ടായിരുന്നു നോട്ടീസ്. ഇന്ന് നല്കുന്ന വിശദീകരണം തൃപ്തികരമല്ലെങ്കില് പി.ആര് സുനുവിനെ പിരിച്ചു വിട്ടുള്ള ഉത്തരവ് വൈകാതെ പുറത്തിറങ്ങും. ഒന്പത് ക്രിമിനല് കേസുകളില് പ്രതിയായ സുനു 15 തവണ വകുപ്പുതല നടപടിയും നേരിട്ട ഉദ്യോഗസ്ഥനുമാണ്. തൃക്കാക്കര പൊലീസ് രജിസ്റ്റര് ചെയ്ത ബലാല്സംഗ കേസില് ആരോപണ വിധേയനായതോടെ സുനുവിനെ നേരത്തെ സര്വ്വീസില് നിന്നും സസ്പെന്ഡ് ചെയ്തിരുന്നു.
തൃക്കാക്കരയില് വീട്ടമ്മ കൂട്ടബലാത്സംഗത്തിന് ഇരയായ കേസില് മൂന്നാം പ്രതിയാണ് പി ആര് സുനു. പരാതിക്കാരിയുടെ വീട്ടുജോലിക്കാരിയായിരുന്ന വിജയലക്ഷ്മിയാണ് ഒന്നാം പ്രതി. വിജയലക്ഷ്മിയുടെ സുഹൃത്ത് രാജീവ് രണ്ടാം പ്രതിയുമാണ്. സുനു അടങ്ങുന്ന സംഘം തൃക്കാക്കരയിലും കടവന്ത്രയിലുമെത്തിച്ച് കൂട്ട ബലാത്സംഗം ചെയ്തുവെന്നാണ് യുവതിയുടെ പരാതി. തൃക്കാക്കര സ്വദേശിയായ വീട്ടമ്മയാണ് പീഡന പരാതി നല്കിയത്. യുവതിയുടെ ഭര്ത്താവ് ജയിലില് കഴിയുകയാണ്. ഇത് മുതലെടുത്ത സിഐയും സംഘവും ഭീഷണിപ്പെടുത്തി ബലാത്സംഗം ചെയ്തുവെന്നാണ് വീട്ടമ്മയുടെ പരാതി.
