കൊച്ചി: മോഹന്ലാലിനെ നായകനാക്കി ജീത്തു ജോസഫ് സംവിധാനം ചെയ്യുന്ന ചിത്രം നേര് നാളെ തീയറ്ററുകളില് എത്തും .ഏറെ നാളുകളായി കാത്തിരുന്ന മോഹന്ലാല് ചിത്രം ‘നേര്’ റിലീസിനെത്തുകയാണ്. നാളെ പ്രദര്ശനത്തിനെത്തുന്ന സിനിമയ്ക്ക് വലിയ പ്രതീക്ഷയാണ് മലയാളി പ്രേക്ഷകരുടെ ഭാഗത്ത് നിന്നുള്ളത്്. എന്നാല്,നേര് ഒരു മാസ് എന്റര്ടെയ്നര് സിനിമയല്ലെന്ന് ജീത്തു ജോസഫും മോഹന്ലാലും മറ്റ് താരങ്ങളും പറഞ്ഞിട്ടുണ്ടെങ്കിലും മോഹന്ലാലിന്റെ ഒരു മുഴുനീള കഥാപാത്രത്തെ തിയേറ്ററില് ആവേശമാക്കാന് ഒരുങ്ങിയിരിക്കുകയാണ് ആരാധകര്. മോഹന്ലാല് വക്കീല് വേഷത്തിലെത്തുന്നു എന്ന പ്രത്യേകതയും നേരിനുണ്ട്.
ചിത്രത്തിന്റെ റിലീസ് തടയണമെന്നാവശ്യപ്പെട്ട് എഴുത്തുകാരന് ദീപക് ഉണ്ണി നല്കിയ ഹര്ജി ചര്ച്ചയായെങ്കിലും കോടതി ഹര്ജി നിരസിച്ചത് സിനിമയ്ക്ക് താത്കാലിക ആശ്വാസമാണ്. നേര് റിലീസ് ദിവസമായ നാളെയാണ് ഹര്ജി വീണ്ടും പരിഗണിക്കുക. വിഷയത്തില് മോഹന്ലാല്, സംവിധായകന് ജീത്തു ജോസഫ്, സഹ തിരക്കഥാകൃത്തും അഭിഭാഷകയുമായ ശാന്തി മായാദേവി, നിര്മ്മാതാവ് ആന്റണി പെരുമ്പാവൂര് എന്നിവര്ക്ക് നോട്ടീസ് അയച്ചു എന്നാണ് റിപ്പോര്ട്ട്.
സംവിധായകന് ജീത്തു ജോസഫും അഭിനേതാവും അഭിഭാഷകയുമായ ശാന്തി മായാദേവിയും ചേര്ന്ന് തന്റെ തിരക്കഥ മോഷ്ടിച്ച് സിനിമയാക്കുകയായിരുന്നുവെന്ന് ഹര്ജിയില് ആരോപിക്കുന്നു.
മൂന്ന് വര്ഷം മുന്പ് കൊച്ചിയിലെ ഹോട്ടലില് വച്ച് നടന്ന കൂടിക്കാഴ്ച്ചയില് ജീത്തു ജോസഫും ശാന്തി മായാദേവിയും ചേര്ന്ന് തന്റെ കഥ നിര്ബന്ധിച്ച് വാങ്ങിയെന്നും പിന്നീട് തന്നെ സിനിമയില് നിന്നും ഒഴിവാക്കിയെന്നും കഥാകാരന് ഹര്ജിയില് ആരോപിക്കുന്നു.
സിനിമ 21-ാം തീയതി റിലീസ് ചെയ്യാനിരിക്കെയാണ് പരാതിക്കാരന് ഹൈക്കോടതിയെ സമീപിച്ചിരിക്കുന്നത്. ജീത്തു ജോസഫും ശാന്തി മായാദേവിയും ചേര്ന്നാണ് സിനിമയുടെ തിരക്കഥ തയാറാക്കിയിരിക്കുന്നത്.